Süni intellekt və kibertəhlükəsizlik “SOCAR Türkiye”nin strategiyasının prioritetlərindəndir.

“SOCAR Türkiye”nin baş direktoru Elçin İbadov Bakı Enerji Forumunda çıxışında onuda deyib ki, rəqəmsal keçid – sadəcə dəbə düşmüş bir trend deyil, o bir zərurətdir.

“O olmadan motivasiyanı, rentabelliyi artırmaq, istedadları cəlb etmək və gələcəyin mədəniyyətini formalaşdırmaq mümkün deyil”,- deyə o bildirib.

İbadov eyni zamanda “SOCAR Türkiye”nin anomaliyaların aşkarlanması, neftemalı zavodlarında prosesslərin rəqəmsallaşdırılması üçün süni intellekt həllərinin tətbiqi kimi layihələrindən və kadr hazırlığı üzrə proqramlarından söz açıb. O bildirib ki, əməkdaşların rəqəmsal savadlılığının artırılması kifayət etmir, rəqəmsal axıcılıq da vacibdir.

Öz növbəsində bp-nin Gürcüstandakı vitse-prezidenti Aytən Hacıyeva-Ağalarova tədbirdə çıxışında bildirib ki, “Azəri-Çıraq-Günəşli” yataqlar blokunda yerləşən “Azəri – Mərkəzi- Şərqi” platforması (Azeri Central East – ACE) bp-nin portfelində yer, alan texnoloji baxımdan ən qabaqacıl platformadır.

“Bizim son və ən əhəmiyyətli layihələrimizdən biri “Mərkəzi Şərqi Azəri” platformasıdır. Bu platforma bp portfelində texnoloji baxımdan ən inkişaf etmiş platformadır. Biz burada rəqəmsal əkiz texnologiyalarını tətbiq etmiş, üst qurğunu və qazma qurğusunu avtomatlaşdırmış, təhlükəsizliyi artırmaq və dəniz əməliyyatlarını rəqəmsallaşdırmaq məqsədilə platformada personalın iştirakını maksimum dərəcədə azaltmışıq”, – deyə o qeyd edib.

Onun sözlərinə görə, rəqəmsallaşma bp üçün strateji əhəmiyyət daşıyır.

“Artıq bir sıra uğurlu layihələri həyata keçirmişik. Xüsusilə Azərbaycanda biz ilk dəfə olaraq tətbiq etdiyimiz bir sıra texnologiyalarla fəxr edirik. Məsələn, “Azəri-Çıraq-Günəşli” yatağında tətbiq edilən “4D seysmik” texnologiyası bizə layların davranışını daha yaxşı anlamağa və hasilatı proqnozlaşdırmağa imkan verdi”,- deyə Aytən Hacıyeva-Ağalarova vurğulayıb.