Ötən gün, tələbəlik illərində  jurnalistikada ilk addımları atmağıma dəstək olan rəfiqəm məni Azərbaycan Dövlət Akademik Musiqili Teatrına “999-cu gecə” tamaşasına dəvət etdi.

Tamaşanın böyüklər üçün müsəlmansayağı 18+ nağıl üzərində qurulduğunu desək yəgin ki, yanılmarıq.

Keçmiş ilə bu günün sintezini ifadə edən tamaşada hamımızın tanıdığı nağıl qəhrəmanları fərqli obrazlarda çıxış edirlər.

Şahzadə, nədənsə, ona yaraşmayan seçim edərək, evli başmaqçıya aşiq olur, müsbət qəhrəman Göycək Fatma isə həmin o başmaqçının ifritə arvadı olur.

Şərq nağıllarında olduğu kimi tamaşa saray intriqaları, yalan və hiyləqərliklərlə doludur.
Yalançını ifşa edən edam edilir, dələduz mükafatlandırılır, haqq yiyəsinə isə səbr diləyirlər.

Bu arada, şah sarayının “cariyələrinin” ecazkar rəqsləri və nəğmələri tamaşanı xeyli canlandırdı.

Hiyləgər vəzirin səsləndirdiyi “Nee-cəə-dii?” sualına cavab olaraq demək olar ki, süjet xaotik və gözlənilməzdir, lakin eyni zamanda pisdə deyil.

Tamaşanın utopik sonu isə bir çox suallar yaradır.

Amma, necə deyərlər, yüz dəfə oxumaqdansa bir dəfə baxmaq daha yaxşıdır.

Aynur Vəliyeva