“SpaceX” korporasiyası “Starlink” peyk internetinə qoşulmaq üçün avadanlıqları bəzi bölgələrdə istifadəçilərə pulsuz təqdim etməyə başlayıb.

Xarici mətbuatın yaydığı məlumata əsasən, ABŞ də daxil olmaqla bir sıra regionlarda xidmət yeni müştərilərə “Starlink” avadanlıq dəstini pulsuz almağı təklif edir. Lakin bunun müqabilində istifadəçilər azı bir il ərzində xidmətlərdən müntəzəm istifadə etməyə borcludurlar. ABŞ-də Starlink terminalı və digər avadanlıqların dəyəri 349 dollar təşkil edir.

Yeni müştərilər ilk ay ərzində peyk internetindən pulsuz istifadə edə biləcəklər. Lakin 30 gündən sonra onların hesabında birillik internet abunəliyi aktivləşdirilir və bu abunəliyin qiyməti konkret regiona görə dəyişir.