Son zamanlar hər kəs özünə borc bilir ki, sosial şəbəkələrdə insanlara öyüd-nəsihət verib ailəsində uşağı ilə, həyat yoldaşı ilə necə davranacağını öyrətsin. Bu dırnaqarası psixoloqların əksəriyyəti heç özü belə doğru-düzgün danışa bilmir, o ki, qalsın kiməsə nəyisə öyrətsinlər.

Ən son podkastda orta yaşlı qadın qadınlarımıza həyat yoldaşlarının xəyanətlərinə normal yanaşmağı, onun əhvalını pozub səs-küy salmamağı tövsiyyə edir, çünki məşuqə ailəni bərkidir. Necə?

Elə ki, kişi məşuqənin yanında mənfi enerjisini boşaldır və evə yenilənmiş gəlir! Əlbəttə ki, bu müəyyən qədər doğrudur, lakin paralel olaraq kişi eyni yerdə ciblərinidə boşaldır, xəstəlikdə tapır, bağlanada bilər və bir müddət sonra orada qeyri-qanuni övladıda ola bilər.

Daha sonra onun ehtirası soyuduqda o yeni bir məşuqə tapa bilər və eyni ssenari ilə hadisələr təkrarlana bilər.

Nəticədə isə evdəki həyat yoldaşı diqqətsiz qalıb xəyanət edə bilər, uşaqları başsız qalıb tərbiyələri pozula bilər və bədbəxt olarlar, və ya həyat yoldaşı onun məşuqəsindən qazandığı xəstəliklərə yoluxub ölə bilər.

Bir müddətdən sonra onun bir-birindən xəbərsiz övladları təsadüfən tanış olub bir-birini sevib evlənə bilərlər və xəstə uşaqlar dünyaya gətirə bilərlər. Bunu düşünən olubmu?

Digər podkastda deyirlər ki,  uşağın sözünü kəsmək olmaz, demək olmaz ki, “sən sus qulaq as anan nə deyir”.

Düzdür, sivil cəmiyyətdə dialoq zamanı söz kəsmək olmaz, xüsusəndə statusa görə sizdən daha yuxarı pillədə olan insanın sözünü kəsmək olmaz.

Dialoqda biri danışıb sözünü bitirdikdə, digəri öz fikrini bildirir. Bu qayda hamı üçün keçərlidir. Ana isə, uşağa nisbətdə, daha yüksək pillədədir və uşağa tərbiyə verilibsə o böyük sözünü kəsməz, qulaq asar sonrada deyiləcək sözü olduqda fikrini bildirə bilər.

Bu arada, bəzi gənclərimizin yüksək tonla, yersiz ifadələrlə, qarşısındakını qınaq obyektinə çevirib ortaya tələb qoymağından söhbət getmir, sadəcə fikir və istək bildirmək nəzərdə tutulur.

Podkast yaradanlar dedikləri hər bir sözü və cümləni tam düşünüb danışmalıdır, çünki onları minlərlə insan dinləyir, onların əksəriyyəti həyat təcrübəsi, normal təhsili olmayan yeniyetmələr və gənclərdir.

Düşünün siz onlara nə öyrətmək istəyirsiniz? Bu nə tendensiyalardır ki, ailə dəyərlərini inkar edir?

Bir dövləti dağıtmaq istəyən ilk öncə o dövlətdə təhsil sistemini, sonra ailə institutunu yox edir, sonra isə o dövlət və millət artıq məhv olur. Bu gedişlə biz məhvə doğru gedirik.