Birja daxilində ticarət platformasının daha da möhkəmləndirilməsi, daha tez bazara inteqrasiya olunması mövzusunda son 3-4 ay ərzində texniki diaqnostika aparılıb.

Bakı Fond Birjasının İdarə Heyətinin sədri Ruslan Xəlilov jurnalistlərlə görüşdə deyib ki, artıq diaqnostikanın nəticələri hazırdır və onun əsasında hazırlanmış strategiyada daxili infrastruktur dəyişikliklərin üç müxtəlif istiqamət üzrə aparılacaq:

“Bu ildən başlayaraq, növbəti illərdə birjanın kapital bazarlarını qaldırmasının iki yolu var: kommersiya istiqaməti bazar iştirakçıları ilə aktiv görüşlər keçirib, onları bazara cəlb etmək və texniki həllərin istənilən şəxsin əməkhaqqı aldığı bankın və ya işlədiyi investisiya fondunun mobil tətbiq üzərindən birjada istədiyi kağızı bir kliklə alıb, sata bilməsini təmin edəcək qədər təkmilləşdirmək. Ötən ildən etibarən biz bu istiqamətdə iş aparırıq, artıq möhkəm komanda formalaşıb, korporativ idarəetmə sistemi qurulub, komitələrin tərkibinə yenidən baxılıb, müəyyən listinq və ticarət qaydalarına dəyişikliklər edilib”, – deyə sədr bildirib.

R. Xəlilov onu da qeyd edib ki, Bakı Fond Birjası Abu-Dabi Fond Birjasına məxsus Tabadul Huba qoşulmaq üçün hazırlıq işlərinə başlayıb.

“Bu, regional birjaları bir habda birləşdirən bir təşəbbüsdür. Artıq haba postsovet, qonşu və Yaxın Şərq ölkələrindən 8 birja qoşulub. BFB-nin bu platformaya qoşulması üçün hüquqi və texniki bazanın hazırlanması işləri aparılır. Birjaların necə qoşulması, köçürmələrin necə həyata keçirilməsi və digər önəmli məsələlər araşdırılır. Haba qoşularaq, Abu-Dabidə fəaliyyət göstərən hər hansı broker və ya investisiya şirkəti, Bakı Fond Birjasının məsafədən üzvü olaraq Birjada ticarət əməliyyatları həyata keçirə biləcək. Eyni zamanda, Azərbaycandanın istənilən broker şirkəti Abu-Dabi, Oman, Qazaxıstan Birjasına qoşulub, orada səhm alqı-satqısı həyata keçirə bilər”, – deyə sədr əlavə edib.