2020-ci ildə pandemiya ilə əlaqədar olaraq daşınmaz əmlak bazarında qiymətlərdə nisbətən sabitlik müşahidə olunub, lakin sonrakı illərdə artım meylləri müşahidə edilib.

Azərbaycan Mərkəzi Bankının (AMB) baş direktoru Şahin Mahmudzadə bu gün maliyyə sabitliyi ilə bağlı keçirilən mətbuat konfransında deyib ki, bütövlükdə, 2020-ci ilin sonu ilə müqayisədə mənzil qiymətlərində 32.4% artım olub:

“Tikinti sektoruna yönəldilmiş investisiyalar müəyyən dövrlərdə dəyişiklik göstərsədə, yaşayış evlərinin tikintisinə ayrılan vəsaitlər və onların əsas kapitala yönəldilmiş investisiyalardakı payı artmaqdadır. Son dövrlərdə bu tendensiya daha da güclənmiş və bazar aktivliyinin yüksəlməsinə səbəb olmuşdur. Yaşayış evlərinin tikintisi üzrə sərmayə qoyuluşlarının artması həm artan tələblə, həm də dövlət və özəl sektor tərəfindən həyata keçirilən yeni layihələrlə bağlı olmuşdur”, – deyə o qeyd edib.

Azərbaycan Mərkəzi Bankından verilən məlumata əsasən, 2024-cü ildə mənzil qiymətlərinin artım tempi sərəncamda qalan gəlirlərin artım tempini üstələyib. Belə ki, Dövlət Statistika Komitəsinin məlumatına əsasən, ötən ilin sonu ilə müqayisədə mənzil qiymətləri 9.9%, sərəncamda qalan gəlirlərin artım tempi isə 5.9% təşkil edib.

Bankın məlumatında qeyd edilib ki, ümumilikdə, 2020-ci ildən etibarən mənzil qiymətləri 32%, sərəncamda qalan gəlirlər isə 39% artıb.

Azərbaycnada mənzil bazarı illə bağlı mövcud açıq mənbələrdən əldə edilən məlumata əsasən Bakı şəhəri üzrə təklif edilən median aylıq kirayə haqqı 927 manat təşkil edir.

Mərkəzi Bankın təqdim etdiyi məlumata əsasən, bu qiymət daşınmaz əmlakın kapitalizasiya müddətinin 19.5 il olmasını şərtləndirir.

Məlumata görə, Bakı şəhəri üzrə təklif olunan orta ev qiymətlərinin orta aylıq nominal əmək haqqına (Bakı üzrə) nisbəti isə 189 ay və ya 15.7 il təşkil edir.

“2023-cü ilin sonu ilə müqayisədə Azərbaycanda mənzil qiymətlərində artım müşahidə edilsə də, bəzi bençmark ölkələrlə müqayisədə bu temp aşağı olmuşdur. Dövlət Statistika Komitəsinin məlumatına əsasən, mənzil bazarında qiymətlər ötən ilin sonu ilə müqayisədə 9.9% artmışdır. Bu artım tempi bəzi bençmark ölkələrlə (Qazaxıstan və Özbəkistan) müqayisədə yüksək olsa da, Türkiyə, Gürcüstan və digər ölkələrlə müqayisədə aşağıdır”, – deyə məlumatda qeyd edilib.