Şənbə və bazar günlərində vətəndaşların bank kartlarından 41048 manat oğurlanıb.

Daxili İşlər Nazirliyinin (DİN) yaydığı məlumata əsasən, aprelin 12-də və 13-də ayrı-ayrı vətəndaşların müxtəlif kiber üsullarla 13 manatdan 11100 manatadək məbləğlərdə pul vəsaitləri bank kartlarından oğurlanıb və vətəndaşların bank kartlarından oğurluqlar davam edir.

“Kartın üzərindəki CVV/CVC kodu, SMS vasitəsilə göndərilən OTP kodu, digər sizə məxsus sistemlərə giriş üçün lazım olan loqin və şifrələr, kartın PİN kodu məxfi məlumatlardır. Bu məlumatları naməlum şəxslərə verdiyiniz halda hesabınızda olan pullar, yaxud pul yoxdursa, kredit formasında sizə zərər vuracaqlar. Bir daha vətəndaşlara şübhəli zənglərdən gələn cəlbedici qazanc, sığorta, bank hesablarının möhkəmləndirilməsi, mədaxil üzrə ödənişlərlə əlaqəli təkliflərə diqqətlə yanaşmağı tövsiyə edirik. Qəti formada şəxsi bank məlumatlarınızı naməlum şəxslərə ötürməyin bu təhlükəlidir”, – deyə məlumatda qeyd edilib.

Qeyd edək ki, dünya təcrübəsində, dələduzluq faktı aidiyyatı qurumlar tərəfindən təsdiq edildiyi halda banklar oğurlanan vəsaitləri chargeback maliyyə əməliyyatı vasitəsi ilə geri qaytarırlar. Azərbaycanda qeyd edilən təcrübə banklar tərəfindən nə dərəcədə istifadə edildiyi haqda məlumat yoxdur.