Spirtli içkilər sağlamlığa əhəmiyyətli dərəcədə zərər vuraraq, xərçəng xəstəliyinin bir sıra növlərinin inkişafı riskini artırır.

“Daily Mail”-ın verdiyi məlumata əsasən, bunu nüfuzlu bioloq-onkoloq, Tibb elmləri professoru Pranoti Mandrekar açıqlamasında deyib.

O, qeyd edib ki, alkoqol, mütəmadi və ya vaxtaşırı qəbul olunmasından asılı olmayaraq, beyinə, ürə-damar sisteminə, ağciyərlərə və immun sisteminə mənfi təsir göstərən ən güclü kanserogenlərdən biridir.

Sözlərini təsdiqləmək üçün onkoloq spirtli içkilərin istehlakı ilə boğaz, qida borusu, qaraciyər, mədəaltı vəzi, mədə, bağırsaq və süd vəzi xərçəngi arasında əlaqə yarandığını sübut edən çoxsaylı tədqiqatlara istinad edib.

Onun sözlərinə əsasən, spirtli içkilər orqanizmdə parçalanarkən zərərli maddələr əmələ gətirir və bu maddələr daxili orqanlara toksik təsir göstərərək, orqanizmdə daxili iltihab yaradır, nəticədə xərçəngin inkişafına səbəb olur.

Bundan əlavə, spirtli içkilər qəbul edilərkən sərbəst radikallar yaranır və bu radikallar DNT-ni zədələyə bilər. Nəticədə hüceyrələr mutasiyaya uğrayaraq bədxassəli şişlərə çevrilə bilər.