Bakıda süni intellekt sahəsində qabaqcıl şirkətlərdən biri olan “Neurotime” və
ADA Universitetinin təşkilatçılığı ilə 6-cı Beynəlxalq Süni İntellekt və Big Data Forumu ADA Universitetində işə başladı.

Tədbirdə çıxış edərək ADA Universitetinin İnformasiya Texnologiyaları və mühəndislik fakültəsinin dekanı Abzətdin Adamov qeyd edib ki, süni zəka BıgData-nın idarə etməsində geniş istifadə edilir.

“Biz bugunki forumda süni zəkanın enerjieffektiv şəkildə istifadəsini, müəssisələrdə süni intellektin tətbiqi imkanlarını, bu texnologiyanın düzgün istifadə edilməsi və onun insan zəkasına nə dərəcədə yaxın olduğunu və perspektivdə süni intellektin insan zekasına maksimal yaxınlaşdırılması məsələlərini müzakirə edəcəyik. Biz düşünməliyik ki, necə bu texnologiyanın effektivliyini və etik istifadəsini təmin edək”, – deyə o, qeyd etdi.

4SİM-in icraçı direktoru Fariz Cəfərov tədbirdə çıxış edərək qeyd edib ki, süni zəkanın logistika və digər sahələrdə geniş istifadə imkanı var.

“Perspektivdə süni zəka global ümumdaxili məhsulun istehsalına 15 trilyard dollardan çox təsir göstərəcək. Yaxın gələcəkdə internet məhsulun 10% artıq süni zəka vasitəsi ilə istehsal olunacaq və onun əsas məqsədi insan fəaliyyətini asanlaşdırmaqdır. Azərbaycanda süni intellekt sosial, rəqəmsal hədəfələrimizə nail olmaq üçun istifadə olunacaq. Ölkəmizdə bu sahədə tənzimləmə və qanunverici bazanın hazırlanması nəzərdə tutulur, lakin super kompüterlər olmadıqca bu məqsədlərə çatmaq mümkün olmayacaq. Azərbaycanda kənd təsərrüfatında, səhiyyədə, idman sahəsində güləş idman novündə artıq süni zəkadan istifadə olunur, gələcəkdə energetika sahəsində tətbiqi və süni zəkaya əsaslanan infrastrukturun inkişafı nəzərdə tutulur”.

Tədbir çərçivəsində “Neurotime” şirkətinin rəhbəri Vüqar Cavadov təqdimatında qeyd etdi ki, sənayedə bu texnologiya yetərincə istifadə edilmir və tətbiginə investisiya yonəldilmir.

“Hazırda kommunikasiya çatışmamazlığı mövcuddur bu sahədə düzgün ekosistemin yaradılmasına, akademik sahə ilə şirkətlərin əməkdaşlıgina ehtiyac var, onların birgə fəaliyyəti təmin edilməlidir. Biz bir sıra qurumlarla süni intellekt üzərində işləyən chatbotlar tətbiq etmişik hansı ki, avtomatlaşdırılmış şəkildə fəaliyyət göstərir. Bu qurumların 7/24 saat müştəri xidmətləri avtomatlaşdırılmış şəkildə verilən sualları chatbot-da süni intellekt ilə cavablandırır”.

ADA Universitetinin professoru Samir Rüstəmov öz növbəsində qeyd edib ki, hazırda chatbot bir neçə asan sualları cavablandırır, lakin mürəkkəb sualları cavablandırmaqda çətinlik çəkir.

“Biz sistemimizdə bank sahəsində sadə dildən istifadə edirik, dialoqların aparılmasında bu bizə dəstək olur, lakin daha mürəkkəb tələblərə cavab verən dialoqları aparmağa imkan verən terminləri və akademik dili daxil edən proqramımız mövcuddur. Biz artıq sualları müxtəlif dillərdə səsli cavablandırılmasını, pdf-lərin yüklənməsi xidmətlərini göstəririk”.

Beynəlxalq Süni İntellekt və Big Data Forumu — süni intellektin bu günü və gələcəyi ilə bağlı qlobal müzakirələrin aparıldığı, onun cəmiyyətə, iqtisadiyyata və texnologiyaya təsirinin təhlil olunduğu nüfuzlu platformadır.

Forumda ADA Universiteti, Florida Texnologiya İnstitutu, Nyu York Universiteti, Tallinn Texnologiya Universiteti və Kolumbiya Universitetinin professorları çıxış edərək, innovasiyalar və süni intellektin gələcək perspektivləri barədə dəyərli bilik və təcrübələrini bölüşəcəklər.

Tədbir çərçivəsində süni intellekt və Big Data sahəsindəki ən son texnoloji yeniliklər, elmi nailiyyətlər və innovativ həllər təqdim olunacaq. Forum yerli və beynəlxalq mütəxəssislər, tədqiqatçılar, sahibkarlar və dövlət nümayəndələrinin iştirakı ilə müxtəlif sahələrdə süni intellektin tətbiqi imkanlarının geniş şəkildə müzakirə olunacağı panel sessiyalarla zəngin olacaq. Bununla yanaşı, Azərbaycanda süni intellektin sənaye, səhiyyə, media, təhsil, kənd təsərrüfatı və digər sahələrdə tətbiqi üzrə mövcud imkanlar və gələcək perspektivlər də Forumun əsas mövzuları arasında yer alacaq.

6-cı Beynəlxalq Süni İntellekt və Big Data Forumu, Azərbaycanın süni intellekt və rəqəmsal transformasiya sahəsində regional liderliyə doğru atdığı növbəti mühüm addım kimi qiymətləndirilir.