Aprelin 5-dən etibarən “Tağıyev.Çar” filminin yerli kinoteatrlarda nümayişinə başlanılıb. Filmin birinci hissəsi “Tağıyev. Neft” filmindən sonra ikinci hissə “Tağıyev.Çar” kinosevərlərin böyük marağına səbəb olub.

Azərbaycanın tanınmış neftçisi və mesenatı Hacı Zeynalabdin Tağıyevinv həyat hekayəsindən bəhs edən filmin birinci hissəsi “Tağıyev. Neft” filmindən sonra filmin ikinci hissəsindən gözləntilər böyük idi.

Qeyd edilən silsilənin ikinci hissəsi – “Tağiyev. Çar” filmi birinci hissədən daha da maraqlı, dinamik və dərinmənalıdır.

Çəkilişlərinin keyfiyyətinə söz olmayan film bir nəfəsə baxılır, xüsusən dialoqlar diqqəti çəkir. Azərbaycanın, xüsusəndə Bakı əhlinin milli koloriti dəqiqliyi ilə, son dərəcə təbii təsvir edilib.

Filmin süjetinin mərkəzində Bakının Balaxanı kəndindən olan neftçi Əliyar Teymurbəyov həyat draması və onun ölümünə səbəb olan balaxanı neft fontanın yaratdığı ekoloji və sosial problemlər, ailəsinin düşdüyü acınacaqlı vəziyyət təsvir edilib.

Bu problemlərin həlli üzərində çalışan Tağıyevin qarşılaşdığı maneələr, Azərbaycanlıların öz torpaqlarında üzləşdikləri ədalətsizliklər və diskriminasiya iş adamının baxış nöqtəsinin dəyişməsinə təsir edir.

Bu yolda Tağıyev təhdidlərlə və açıq aşkar düşmənçiliklə qarşılaşır.

Filmdə Tağıyevin böyük məqsədlərə nail olmaq üçün verdiyi qurbanlar və onun çar hakimiyyəti ilə münasibətlərdə prioritetlərinin dəyişməsinə təsir edən amillər göstərilir.

Birmənalı şəkildə filmə baxmağa dəyər və sonda göstərilən anonsa əsasən növbəti hissə daha da maraqlı və həyəcanlı olmalıdır.

Aynur Vəliyeva