Bu günlərdə ruhumuzu qidalandırmaq, süfrədən, seriallardan və əsas smartfonlardan ayrılaraq fərqli emosiyalar yaşamaq üçün Azərbaycan Dövlət Akademik Musiqili Komediya Teatrında Əmir Pəhləvanın əsəri üzərində qurulmuş “Sevənlərindir dünya” tamaşasına bilet aldım.

Teatrda, konsert zalında canlı izlənilən istənilən ifa və tamaşanın məncə tam başqa təsiri olur insana.

Tamaşaçıların və aktyorların müsbət enerjisi məkanda fərqli abu-hava yaradır. Elə təkcə buna görə teatr və konsertlərə getməyə dəyər.

Tamaşaya gəldikdə isə, deməliyəm ki, birinci hissəsində ötən əsrin tamaşalarının və filmlərinin süjetlərini xatırlatdı. Bəzi məqamlarda Anarın “Evləri köndələn yar”ını bəzilərində isə Tofik Tağızadənin “Görüş” filmini xatırlatdı.

Baş qəhrəmanlar yeni tanış olub bir-birinə aşiq olan iki gəncdir. Lakin onların ailə olması üçün ciddi maneələr aşılmalıdır.
Tamaşada müasir cəmiyyətimizin hazırda yaşadığı sosial problemlər əks olunur.

Özbək rəqsləri və Azərbaycan toyu səhnələri tamaşanı xeyli canlandırdılar. Kürəkənliyə namizədə Azərbaycansayağı klassik təsir mexanizmi dəqiqliyi ilə təsvir edildi.

Aktyor oyununa gəldikdə, deməliyəm ki, ikinci plan və epizodik rolları ifa edən oyunçular  daha təbii və inandırıcı görünürdülər.

Sonda bütün maneələrə baxmayaraq gənclər evləndilər və toyun atmosferindən bəlli olan uzun və məşəqqətli yola çıxdılar.

Aynur Vəliyeva