Son günlər bir çox tanıdığım ciddi insanların “Netflix”-də nümayiş olunan “Yeniyetmə” və ya “Keçid dövrü” (“Adolescence”) mini-serialı haqda müsbət rəylərini oxuyub nəhayət filmə baxdım.
Həqiqətəndə bütün valideynlərin, müəllimlərin və hətta hüquq mühafizə orqanlarının nümayəndələrinin baxması qərəkən bir filmdir.

Bir çoxları sosial şəbəkələrin uşaqlarımıza necə təsir etdiyinin və bu təsirin hansı fəsadlar yaratdığının fərqində deyil.

Eyni zamanda, böyük nəslin nümayəndələri əksər hallarda sosial şəbəkələrdə və məktəblərdə yeniyetmələr arasında baş verənlərdən, müxtəlif çelenclərdən, bullinqlərdən xəbərdar deyillər. Gündəlik qayğılar, yorğunluq və bəzən laqeydlik nəticəsində uşaqlarımız diqqətdən kənarda, “şəbəkələr”in qurbanına çevrilirlər.

Ən məyusedici hal isə odur ki, bəzən döyənlər, öldürənlər – döyülüb, ölənlərdən daha məsum olurlar və ya işin altında dərin psixoloji travmalar və sarsıntılar qizlənir. Ümumilikdə isə onların hər ikisinin orta hesabla sosial şəbəkənin qurbanı olduğu məlum olur.

Bir valideyn kimi deyə bilərəm ki, yeni nəsil gənclər bizlərdən çox fərqli manipulyativ düşüncəyə və həyata baxışa malikdir.

Bir çoxları, müxtəlif mənbələrdən, bəlkə də onların düzgün istifadə edə bilməyəcəkləri manipulyasiya və psixoloji təsir aləti olan biliklər əldə edərək onların məhz neqativ dağıdıcı gücündən istifadə edirlər. Onlar buna bir oyun kimi baxırlar, psixoloji fəndlərdən istifadə edərək özgüvənlərini artırırlar, lakin qarşı tərəf üçün nəticələr bəzən çox acınacaqlı olur.

Hərkəsə seriala baxmağı və nəticə çıxarmağı tövsiyyə edərdim.