Sosial şəbəkələrdə Azərbaycan Təhsil Nazirliyinin Məktəbəqədər və Ümumi Təhsil üzrə Dövlət Agentliyinin (MÜTDA) əmək haqqı vermədiyi bildirilir.

“Facebook” sosial şəbəkəsində qruplardan birində 3 aydır müəllimlərin maaşlarının verilmədiyi bildirilir.

“Çəkilən bütün əziyyətlər ortada qalır. Müəllimlər motivasiya ola bilmir, şagirdlərlə keçirilən dərs tam keyfiyyətsiz olur, uğursuzluğa doğru addımlayırlar.

2019-cu ildən Peşə Təmayüllü siniflər layihəsi” fəaliyyət göstərir. Kifayət qədər maliyyə ayrılmasına rəğmən müəllimlərə məvacib ödənilmir. Layihənin maliyyəsinə MÜTDA baxırdı. Lakin layihənin idarəetməsi yeniləndi. İndi də nazirlik tərəfindən guya maliyələşdirilir.

Bir sinifdə bir rəhbər və 2 ixtisas müəllimi olur. Maaş isə iş günü və saat hesabı ilə hesablanır. Müqavilələr isə 3 aylıqdır. 3 aydan bir yenidən müqavilələr yenilənir. Ağır bir proses keçirilir, sənədlər yenidən verilir, amma heç bir nəticəsi olmur. 31 mart bağlanan müqavilələrin vaxtı bitir. Maaşlar verilməyib, indi kim niyə yenidən müqavilə imzalasın? Başqa yenilərini tapsalar, hər 3 aydan bir yeni müəllim… Bəs dərsin keyfiyyəti, bəs peşəkarlıq, bəs formalaşdırılan bacarıqlar necə olacaq? Məgər bu oyundur???”, – deyə sosial şəbəkə istifadəçisi olan müəllimlərdən biri qeyd edib.

MÜTDA ilə 146-2 qaynar xəttinə müraciət edərək əlaqə saxladıq və cavab olaraq öncədən kimin maaşlarının verilmədiyi sorğulandı, sonra isə yanlış məlumat olduğu qeyd edilərək rəsmi cavab almaq üçün portal.edu.az portalı üzərindən müraciət etmək tövsiyyə edildi.