Azərbaycan Kinematoqrafçılar İttifaqının təşkilatdılığı ilə “Azərbaycan” kinoteatrında  bu həftə üç filmin nümayişi keçiriləcək. Filmlərin nümayişinə giriş sərbəstdir.

Sabah, 11 mart tarixində saat 19:10-da “Azərbaycan” CinemaPlus-da Rejissor Orxan Ağazadənin “Kinomexanikin qayıdışı” tammetrajlı sənədli filminin təkrar nümayişi keçiriləcək.

Süjet: Ucqar dağ kəndində vaxtilə kinomexanik işləmiş Səmid öz doğma kəndini yenidən ağ ekran qarşısında toplamaq arzusundadır. Maneələrlə dolu bu yolda o özünə nəhayət müttəfiq tapır – gənc yaşlarında olan həvəskar animasiyaçı Ayazı. İki nəslin nümayəndələri birləşib kinonu və onun işığını kəndə gətirir.

Filmin yaradıcı heyət: prodüserlər François-Pierre Clavel, Lino Rettinger, müəllif və rejissor Orxan Ağazadə, təsvir rejissoru Daniel Quliyev. Film 90 dəqiqə davam edəcək.

Martın 12-də saat 19.00-da “Azərbaycan” CinemaPlus-da AKİ Murad İbrahimbəyovun 60 illik yubileyi münasibətilə rejissorun “İnsan” trilogiyası (20 dəqiqə) və “Rus səyyahları Afrikada” (65 dəqiqə) sənədli filmlərini nümayiş etdirəcək.

M. İbrahimbəyovun “İnsan” sənədli trilogiyasına daxil olan “Neft” filmi Venesiya Beynəlxalq Film Festivalının qısametrajlı filmlər müsabiqəsində “Gümüş şir” mükafatının qalibi olub.