Bir sıra şirkət işçilərinə əmək haqqını ödəyə bilmir, buna səbəb maliyyə əmliyyatlarını həyata keçirmək üçün istifadə olunan “Asanİmza” sisteminin işində iki gün davam edən nasazlıqdır.

Şirkət rəhbərləri və mühasiblər Dövlət Vergi Xidmətinin portalına daxil olmaqda və qaimələrin göndərilməsi və digər “Asanİmza” tələb edən əməliyyatları icra etməkdə çətinlik çəkirlər.

Eyni zamanda, bildirilir ki, qeyd olunan nasazlıq bankların, Dövlət Vergi Xidmətinin, Əmək və Əhalinin Sosial Müdafiəsi Nazirliyinin elektron xidmətlərindən istifadəyə imkan vermir.

İki gün davam edən problemə baxmayaraq xidmət tədarükçüsü istifadəçilərə heç bir açıqlama ilə müraciət etməyib. “Asanİmza”-nın saytı ötən ildən etibarən fəaliyyəti ilə bağlı hər hansı bir məlumat açıqlamayıb.

“Facebook”-da qurumun rəsmisi problemlə bağlı sualı cavablandıraraq bildirib ki, hazırda Azercell mobil operatorunda “Asan İmza” mobil rəqəmsal imzanın istifadəsində müyyən çətinlik müşahidə olunur.

“Hazırda bu istiqamətdə müvafiq işlər aparılır və mobil operator yaranmış çətinliklə bağlı məlumatlandırılmışdır. Əlavə suallarınız yaranarsa bizimlə əlaqə saxlayın. Asan İmza cağrı mərkəzi 1847 ilə əlaqə saxlayın”

Məlum olduğu kimi, adiyyəti qurumlar istifadəçilərin sistemə girişinin bərpası üzərində çalışır və ötən günə nisbətən bu gün Dövlət Vergi Xidmətinin portalına giriş asanlaşıb, lakin problem tam həll olunmayıb.

Qeyd edək ki, “Asan İmza” (Mobil imza) – Dövlət Vergi Xidməti və mobil operator tərəfindən verilən və elektron xidmət istifadəçisinin autentifikasiyasını, sənədin elektron imzalanmasını və imzalayan şəxsin şəxsiyyətinin müəyyən edilməsini (identifikasiyasını) təmin edən xidmətdir. “ASAN İmza” (Mobil İD) e-xidmətlərə daxil olan və rəqəmsal imzalar edən zaman kimliyinizi təsdiqləmək üçün mobil identifikasiya alətidir.

“ASAN İmza” bütün mövcud e-xidmətlərdən istifadədə tələb olunur və rəqəmsal mühitdə fiziki İD-karta bərabər sənəd kimi sertifikatlara bağlı olan mobil telefon SIM-kartıdır.