E-bildiriş, icazə və şəhadətnamələrin verilməsi üçün dövlət rüsumları açıqlanıb

Azərbaycan prezidenti İlham Əliyev “Qaz təchizatı haqqında”, “Dövlət rüsumu haqqında”, “İxrac nəzarəti haqqında”, “İxrac məqsədli neft-qaz fəaliyyətinə xüsusi iqtisadi rejimin tətbiqi haqqında”, “Elektroenergetika haqqında” və “Energetika haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikasının Qanununu təsdiqləyib.

Qanuna əsasən dövlət rüsumlarının ödənilməsi zamanı hər bir dövlət rüsumu tutulmalı olan hüquqi hərəkət üzrə tərtib edilmiş “e-bildiriş”ə görə 0,02 manat məbləğində xidmət haqqı tutulur və müvafiq icra hakimiyyəti orqanının müəyyən etdiyi orqanın (qurumun) işçilərinin sosial müdafiəsinin gücləndirilməsi və maddi təminatının yaxşılaşdırılması məqsədilə həmin orqanın xəzinə hesabına köçürülür. Bu vəsaitdən istifadə qaydası müvafiq icra hakimiyyəti orqanının müəyyən etdiyi orqan (qurum) tərəfindən müəyyən edilir.”

Bunula yanaşı sənəddə nəzərdə tutulmuş əlavələrə əsasən aşağıda göstərilən fəaliyyət növlərinə görə icazə və şəhadətnamələrin verilməsi üçün ödənislər nəzərdə tutulur:

Rüsumsuz ticarət mağazasının yaradılmasına icazənin verilməsi üçün 100 manat
Su elektrik stansiyaları və bio kütlədən alınan qaz və ya digər yanacaq növü vasitəsilə elektrik və istilik enerjisi istehsal edən elektrik stansiyalarında elektrik enerjisinin istehsalı üzrə 500 kilovatdan, digər hallar üzrə isə 150 kilovatdan çox elektrik enerjisinin istehsalına icazənin verilməsi üçün 150 manat
Elektrik enerjisinin ötürülməsinə icazənin verilməsi üçün 150 manat
Elektrik enerjisinin paylanmasına icazənin verilməsi üçün 150 manat
Elektrik enerjisinin ixrac və idxal edilməsinə icazənin verilməsi üçün 150 manat
Sənaye parkının, sənaye məhəlləsinin və aqroparkın rezidentinin qeydiyyat şəhadətnaməsinin verilməsi üçün 70 manat
Texnologiyalar parkının qeydiyyat şəhadətnaməsinin verilməsi üçün 70 manat
Texnoloji biznes inkubatorunun qeydiyyat şəhadətnaməsinin verilməsi üçün 70 manat
“İxrac nəzarəti haqqında” Azərbaycan Respublikasının Qanununa əsasən ixrac nəzarətinə düşən malların (işlərin, xidmətlərin, əqli fəaliyyətin nəticələrinin) ixracı, təkrar ixracı, idxalı, təkrar idxalı və tranziti üçün icazənin verilməsi üçün 100 manat
İxrac məqsədli neft-qaz fəaliyyətinə xüsusi iqtisadi rejimin tətbiqi haqqında şəhadətnamənin verilməsi üçün 100 manat
Qazın istehsalına və təbii qazın emalına icazənin verilməsi üçün 200 manat
Qazın nəqli üçün icazənin verilməsi üzrə 150 manat
Qazın paylanmasına icazənin verilməsi üçün 50 manat
Yeraltı qaz anbarlarının işlənməsi, tikilməsi və istismarına icazənin verilməsi üçün 150 manat
Sənaye qaz qurğusunun istismarına icazənin verilməsi üçün 100 manat
Neft və qaz yataqlarının kəşfiyyatına icazənin verilməsi üçün 150 manat
Neft və qaz yataqlarının işlənməsinə və hasilatına icazənin verilməsi üçün 150 manat
Neft və neft məhsullarının boru kəmərləri vasitəsilə nəqlinə icazənin verilməsi üçün 150 manat