Yaxın 5 ildə Bakı ətrafı dəmir yollarında geniş təkmilləşdirmə işləri aparılacaq.

Bu məsələ ilə bağlı rəqəmsal inkişaf və nəqliyyat nazirinin müşaviri Rəşad Bayramov Facebook sosial şəbəkəsində paylaşım edib.

Məlum olduğu kimi Azərbaycan prezidenti İlham Əliyevin ötən həftə imzaladığı sərəncama əsasən “Bakı şəhəri və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı” təsdiq edilib.

R. Bayramov sərəncama açıqlama olaraq bildirib ki, Dövlət Proqramında növbəti 5 ildə dəmiryol sahəsində aşağıdakı işlər görüləcək:

• Bakı–Xırdalan–Sumqayıt xəttinin təkmilləşdirilməsi (2025–2027):

Biləcəri–Xırdalan–Sumqayıt dəmiryol xəttində planlaşdırılan işlərin, o cümlədən dəyişən cərəyan dartı sisteminə keçidin tamamlanması, Bakı sərnişin–Biləcəri–Xırdalan–Sumqayıt dəmiryol xəttinin qatarburaxma, eləcə də sərnişindaşıma qabiliyyətinin artırılması, yeni dayanacaqların istismara buraxılması.

• Bakı–Pirşağı–Sumqayıt xəttinin təkmilləşdirilməsi (2026−2028):

Bakı sərnişin–Pirşağı–Sumqayıt dəmiryol xətlərində planlaşdırılan işlərin, o cümlədən dəyişən cərəyan dartı sisteminə keçidin tamamlanması, dəmiryol xəttinin qatarburaxma, eləcə də sərnişindaşıma qabiliyyətinin artırılması, yeni dayanacaqların istismara buraxılması.

• Bakıxanov−Binə−Qala xəttinin bərpası (2026−2028):

Dəyişən cərəyan dartı sisteminə keçidin tamamlanması, dəmiryol xəttinin qatarburaxma qabiliyyətinin artırılması, eləcə də sərnişindaşımanın bərpa edilməsi, yeni dayanacaqların istismara buraxılması.

• Zabrat−Maştağa−Bağlar xəttinin bərpası (2028−2030):

Dəmiryol xəttinin qatarburaxma, eləcə də sərnişindaşıma qabiliyyətinin bərpa edilməsi, yeni dayanacaqların istismara buraxılması

• Yeni Suraxanı−Hövsan xəttinin bərpası (2026−2027):

Dəyişən cərəyan dartı sisteminə keçidin tamamlanması, dəmiryol xəttinin qatarburaxma qabiliyyətinin artırılması, eləcə də sərnişindaşımanın bərpa edilməsi, yeni dayanacaqların istismara buraxılması.

• Güzdək−Qaradağ xəttinin bərpası (2027−2029).

Dəmiryol xəttinin qatarburaxma qabiliyyətinin bərpa edilməsi, yük qatarlarının əsasən bu istiqamətdə hərəkəti hesabına Bakı–Xırdalan–Sumqayıt dəmiryol xəttində sərnişindaşıma üzrə qatar buraxıcılığının artırılması nəzərdə tutulub.