Azərbaycan Sağlamlıq və Termal Turizmə Dəstək Assosiasiyasının təşkilatçılığı ilə Sumqayıt şəhərində yerləşən “Turan” Qastroturizm Akademiyasına infotur keçirilib.

İnfoturda turizm şirkətlərinin, hotellərin və media nümayəndələri iştirak ediblər.

Azərbaycan Sağlamlıq və Termal Turizmə Dəstək Assosiasiyasının sədri Ruslan Quliyev Sumqayıt şəhərinə və şəhər bulvarına təşkil edilən gəzinti zamanı Sumqayıt şəhərinin tarixi, burada son illər aparılan tikinti-quruculuq işləri, şəhərin yaxın illərdə dünyanın tanınmış turizm mərkəzlərindən birinə çevrilmək imkanları barədə məlumat verib.

“Turan” Qastroturizm Akademiyasının icraçı direktoru Doğan Tomris Azərbaycanda xüsusilə restoran və hotel sektorunda xidmətin keyfiyyətində ciddi problemlərin olduğunu və bunun da ölkəyə gələn turistlərdə narazılıq yaratdığını bildirib.

O, mövcud olan problemlərin həllini turizmin müxtəlif istiqamətləri üzrə xidmət personalının hazırlanması üçün peşə təhsili kurslarına böyük ehtiyac olduğunu qeyd edib.

Doğan Tomris bildirib ki, Qastroturizm Akademiyasında 11 ixtisas üzrə mütəxəssislərin hazırlandırılır.

Türk Əməkdaşlıq və Kordinasiya Agentliyi Başqanlığının (TİKA) dəstəyi ilə Türkiyənin Səlcuk, 18 Mart universitetlərinin müəllimləri mütəxəssislərin hazırlanmasına cəlb edildiyini deyib.

Gələcəkdə akademiyada kurs keçən iştirakçılar Türkiyədə təlimlərdə iştirak edəcək.

Doğan Tomris onu da diqqətə çatdırıb ki, “Turan” Qastroturizm Akademiyasına tələbələr Dövlət Məşğulluq Agentliyi və Dövlət Peşə Agentliyi ilə əməkdaşlıq çərçivəsində, turizm şirkətləri, hotel və restoranlardan gələn sifarişlər əsasında və nəhayət, sərbəst kanallar vasitəsilə müraciət edənlər xətti ilə cəlb olunub: “Məzunlarımızı işlə təmin edəcəyik və bunun üçün əvvəlcədən müxtəlif təşkilatlarda olan vakansiyaları müəyyənləşdiririk”.

İnfotur çərçivəsində “Turan” Qastroturizm Akademiyasına ekskursiya keçirilib və iştirakçılar milli mətbəx master klaslarını, ustad dərslərini, həmçinin komanda işini (düşbərə, qutab, salat, şərbət və s.) və qiymətləndirməni müşahidə ediblər.

Daha sonra “Turan” Qastroturizm Akademiyasının yaranmasında iştirak edən qurumların nümayəndələrinə təşəkkürnamələr təqdim edilib.