Azərbaycan vətəndaşları 72 ölkəyə vizasız, təkcə pasportla səfər edə bilirlər.

Azərbaycan “Henley & Partners” şirkətinin 2025-ci ilin I rübü üçün dərc etdiyi Dünya Pasport İndeksində öz mövqeyini qoruyaraq 70-ci yerdə qərarlaşıb.

Reytinq cədvəlində Gürcüstan və Moldova 44-cü yeri bölüşərək 122 vizasız istiqamətə çıxış əldə edib. Ermənistan isə 68 vizasız istiqamətlə 74-cü pillədəki mövqeyini saxlayıb.

Sinqapura vətəndaşları 195 ölkəyə vizasız və ya çatdıqdan sonra viza almaqla səyahət edə bilirlər və bu ən güclü pasporta malik olmalarının göstəricisidir.

İkinci yerdə Yaponiya qərarlaşıb, bu ölkənin vətəndaşları üçün 193 istiqamət üzrə vizasız səfər mümkündür

Üçüncü yeri Finlandiya, Fransa, İtaliya, Almaniya, Cənubi Koreya və İspaniya bölüşürlər – bu ölkələrin vətəndaşları 192 ölkəyə vizasız və ya çatdıqdan sonra viza almaqla səfər edə bilərlər.

Dördüncü sırada Avstriya, Danimarka, İrlandiya, Lüksemburq, Niderland, Norveç və İsveç yer alır – 191 ölkəyə vizasız səyahət imkanı mövcuddur. İlk beşliyi isə Belçika, Yeni Zelandiya, Portuqaliya, İsveçrə və Böyük Britaniya tamamlayır (190 ölkə).

İlk onluğa daxil olan digər ölkələr:

• Avstraliya, Yunanıstan (189 ölkə);
• Kanada, Malta, Polşa (188 ölkə);
• Çexiya, Macarıstan (187 ölkə);
• Estoniya, ABŞ (186 ölkə);
• Latviya, Litva, Sloveniya, BƏƏ (185 ölkə).

Hesabat Beynəlxalq Hava Nəqliyyatı Assosiasiyasının (IATA) eksklüziv və rəsmi məlumatlarına əsaslanan dünyanın ən böyük və dəqiq turizm məlumat bazasına istinad edir.