Azərbaycan İdman Akademiyasında kütləvi ixtisarların baş verdiyi ilə bağlı məlumatlar gündəm olub.

Azərbaycan İdman Akademiyasının mətbuat xidməti bəzi KİV-lərdə kütləvi ixtisarlarla bağlı yayılan məlumatları təkzib edib.

Akademiyanın rəsmi məlumatında qeyd edilib ki, 100 nəfərin ixtisarı ilə bağlı deyilənlər doğru deyil.

“Təəssüf ki, məlumat dəqiqləşdirilmədən dərc edilib. Məlum olduğu kimi, Nazirlər Kabineti 2024-cü il mayın 13-də Azərbaycan Dövlət Bədən Tərbiyəsi və İdman Akademiyasının yenidən təşkili və Akademiyanın publik hüquqi şəxsə çevrilməsi ilə bağlı yeni nizamnaməsinin təsdiq edilməsi haqqında qərar qəbul edib.

Bunu əsas götürərək Azərbaycan İdman Akademiyası təhsil strategiyasını təkmilləşdirməyi və ən qısa müddətdə beynəlxalq standartlara nail olmağı qarşısına məqsəd qoyub və bunun üçün genişmiqyaslı islahatlara başlanılıb.

İslahatlar Akademiyanın inzibati heyətinin formalaşdırılması da daxil olmaqla bir neçə mərhələni əhatə edir. Hazırda Akademiyanın inzibati heyətinin işə qəbulu müasir tələblər nəzərə alınmaqla müstəqil münsiflər heyətinin iştirakı ilə aparılan fərdi müsahibələr və prosesin videoçəkilişi yolu ilə həyata keçirilir. Müvəffəqiyyətli namizədlərə müvafiq vəzifələr təyin ediləcək. Lakin proses hələ tam başa çatmayıb və tamamlanmamış yalan məlumatların yayılması islahatlara ziyan vura və onların nəticələrinə təsir göstərə bilər.

İnanırıq ki, yaxın gələcəkdə idman ictimaiyyəti dövlət idman siyasətinin tələblərinə uyğun olaraq peşəkar idmanın inkişafına yönəlmiş bu islahatların müsbət nəticələrinin şahidi olacaq”, – deyə məlumatda bildirilir.