Azərbaycan Respublikası Səhiyyə Nazirliyi, Ədliyyə Nazirliyi və İnnovasiya və Rəqəmsal İnkişaf Agentliyinin birgə təşəbbüsü ilə yeni övladı olmuş valideynlər üçün doğum haqqında şəhadətnamənin alınması prosesi asanlaşdırılıb.

Bunun üçün “mygov” tətbiqinə daxil olub “Həyat hadisələri” bölməsindən “Valideyn olmaq” seçimini edin və ya “Xidmətlər” bölməsindən “Doğum şəhadətnaməsinə müraciət” xidmətini seçərək uşağın adını və soyadını daxil etmək, qeydiyyat orqanını və valideynin əlaqə nömrəsini seçmək tələb olunur.

Daha sonra, məlumatları təsdiq edib müraciəti tamamlamaq lazımdır. Şəhadətnamə mygov-da “Ailə məlumatlarım” bölməsində rəqəmsal olaraq görünəcək. Valideynlər öz istəkləri ilə sonradan övladlarının fiziki şəhadətnaməsini də əldə edə bilərlər.

Əlavə üstünlük: Uşağın doğulmasına görə birdəfəlik müavinət avtomatik təyin edilir və “Kapital Bank”a məxsus “Birbank” mobil tətbiqi vasitəsilə əldə olunur.