Sənəddə boşandıqdan sonra valideynlərin uşaqların üzərində hüquqları, məsuliyyətləri, alimentin indeksasiyası və ödənilməsi proseduru ilə bağlı dəyişikliklər nəzərdə tutulur.

Ali Məhkəmənin Mülki Kollegiyasının sədri, Məhkəmə-Hüquq Şurasının üzvü Sənan Hacıyev bununla bağlı Facebook səhifəsində paylaşım edib.

“Ailə mübahisələrinə baxılması ilə bağlı məhkəmə təcrübəsinin köklü surətdə dəyişdirilməsinə səbəb olacaq Plenum qərarı dərc olunub. Bu Plenum qərarının məqsədi ailə mübahisələri üzrə ədalət mühakiməsinin səmərəliliyinin artırılması, vətəndaşların hüquq və azadlıqlarının daha effektiv müdafiəsi, uşaqların üstün mənafelərinin qorunması, habelə ayrı-ayrı kateqoriya işlərə baxılması üzrə məhkəmə təcrübəsinin vahidliyinin təmin edilməsidir”, – deyə kollegiya sədri qeyd edib.

Belə ki, qərara əsasən alimentin minimal miqdarının minimal əməkhaqqının miqdarı nəzərə alınaraq avtomatik indeksasiyası nəzərdə tutulur və valideynin əməkhaqqının 50% miqdarında müəyyən edilir. Alimentin məbləğini yetkinlik yaşına çatmayan uşağın adına açılmış bank hesabına köçürmək barədə tələbə artrıq müstəqil iddianın qaldırılmasına ehtiyac qalmır, çünki proses sadələşdirilir və qətnamənin icra qaydasında ərizənin verilməsi yolu ilə öz həllini tapır.

Yetkinlik yaşına çatmayan uşağdan ayrı yaşayan valideynə ölkədən xaricə daimi yaşamaq üçün köçdüyü halda uşağı özü ilə aparmasına icazə verilmir. Qanunda yetkinlik yaşına çatmayan
vətəndaşın ölkədən valideynlərinin biri ilə getməsi qaydasını tənzimləyərkən onlar
arasında ayrı-seçkilik qoyulmayıb, uşaqdan ayrı yaşayan valideynlə də ölkədən gedə
bilməsi hüququ istisna edilməyib. Lakin belə bir hüququn realizəsi üçün ilk növbədə
ayrı yaşayan valideynin uşaqla ünsiyyət hüququ tanınmış olmalı və müəyyən olunmuş
ünsiyyət qaydasının (müddətinin) buna imkan verib-verməməsi aydınlaşdırılmalıdır.

Plenum qərarının mətni ilə burada tanış ola bilərsiz.