Bu günlərdə sosial şəbəkələrdə geniş müzakirələrə səbəb olan “Keşlə bazarı”nın köçürülməsi ilə bağlı ticarət mərkəzində fəaliyyət göstərən sahibkarların narazılıqları maraq yaratdı.

Düzünü deyim, baxmayaraq ki, daimi Bakı sakiniyəm, ara-sıra TikTok-da və İnstagram-da rastlaşdığın sərfəli qiymətə balıq reklamı xarakterli videolar olmasaydı bu bazarın mövcud olduğu haqda məlumatım olmazdı.

Şəhərin mərkəzindən xeyli kənarda yerləşən bu bazar gözləntilərimi doğrultmadı, çünki sosial şəbəkələrdə paylaşılan videolarda görüntülənən palçıqlı məkan, antisanitariya şəraiti müşahidə olunmadı.

Bazarın təhlükəsizliyini təmin edən işçilər yaxşı mənada paxıllığıma səbəb oldu, çünki tanıdığım strateji obyekt sayıla biləcək binalar var ki, kənar müdaxilədən bu qədər qorunmur.

Bazarda çalışnların verdiyi məlumata əsasən, bazarın bağlanacağı ilə bağlı öncədən xəbərdarlıq edilib, hətta yaxınlıqda və şəhərin dıgər hissələrində, mikrorayonlarda çalışmaq üçün yerlərdə təklif olunub, lakin sahibkarlar razılaşmayıblar.

Əsas səbəb bazarın bayram ərəfəsində, ticarətin güclü gedən vaxtında köçməyin zərərli olacağı idi. Bundan başqa, təklif edilən məkanların ticarət üçün münbit olmadığı qeyd edilib. Bazarı tərk etməyən sahibkarların əsas səbəblərindən biridə bazarda çalışanların tam tərkiblə yeni ünvana köçmək arzusu olub.

Sonda tərəflər razılığa gəliblər ki, “Keşlə bazarı” fəaliyyətini “Montin” kimi tanınan ərazidə yerləşən “Eurohome” ticarət mərkəzində xüsusi inşa edilən sahədə tam tərkiblə, eyni kirayə şərtləri ilə davam edəcək.

Qeyd edək ki, 2025-ci il fevralın 1-dək bazar olduğu yerdə fəaliyyət göstərir.

Bazarın özəlliyi onun axşam bazarı olmağı (saat 18.00-20.00 arası ticarət başlayır), satışa çıxarılan qida məhsullarının yüksək keyfiyyəti və təzə dəniz məhsullarının nisbətən daha aşağı qiymətə satılmasıdır.