Əlbəttə ki, səbəb təkcə sosial təminat deyil, lakin bu məsələ sonuncu sıralarda da deyil. Həkimlərimiz xaricdə çalışaraq daha geniş inkişaf imkanları əldə edirlər.

Lakin TƏBİB-in İcraçı direktoru Vüqar Qurbanov TƏBİB-in 2024-cü ilin yekunlarına və 2025-ci ilin planlarına dair mətbuat konfransında sualları cavablandıraraq bildirib ki, xaricdə çalışan həkimlərimizin ölkəyə qayıtması ilə bağlı xüsusi bir proqram tətbiq olunur.

“Bu proqram iki ildən çoxdur ki, tətbiq olunur. Xaricdə təhsil almış və fəaliyyətlərini xaricdə davam etdirən həkimlərimizin ölkəyə geri döndükdən sonra maddi təminatının yaxşılaşdırılması ilə bağlı bir proqramdır. Artıq 200-ə yaxın həkimimiz bu proqram vasitəsilə ölkəyə geri dönüb”.

V. Qurbanov deyib ki, gələn il ərzində Almaniyadan ölkəmizə çoxsayda həkimlərin qayıtması gözlənilir.

“Bununla bağlı ciddi iş görülür. Biz artıq Almaniyada yaşayan nüfuzlu həkimlərimizin bir hissəsi ilə Azərbaycanda cərrahi xidmətlərin təşkili və regionlarda inkişafı ilə bağlı pilot layihəyə başlamışıq. Bu pilot layihənin rəhbəri Azərbaycanı xaricdə təmsil edən bir həkimimizdir. Onunla birlikdə Almaniyada çalışan çoxsaylı həkimlərimizlə danışıqlarımız olub. Ümid edirəm ki, gələn ilin sonuna qədər bütün bölgələrimizdə xaricdə oxumuş və çalışan həkimlərimizin fəaliyyətini təmin edə biləcəyik və bu, ölkəmiz üçün böyük bir uğur olacaq”.

Qeyd edək ki, ölkəmizdə çalışan və yüksək peşəkarlığa malik olan həkimlər bildirir ki, peşəsi üzrə xarici təkmilləşdirmə kurslarına, müxtəlif beynəlxalq tibbi simpozium və seminarlara şəxsi vəsaitləri hesabına qoşulurlar.

Bundan başqa, həkimlərin xarici ölkələrdə sosial təminatına qəldikdə nəzərə almalıyıq ki, Avropa ölkələrində həkimlərin ağır əməyinə görə verilən rəsmi əməkhaqqı ilə Azərbaycanda verilən əmək haqqı arasında böyük fərq var. Bu fərq hətta bu ölkələrdə mövcud olan yaşayış qiymətlərini nəzərə aldıqda belə aktuallığını otirmir.

Müqayisə üçün qeyd edək ki, hələ 2018-ci ildə İsveçdə stomatoloqlar aylıq 7-10 min avro, Almaniyada orta səviyyəli həkimlər vergilər xaric 2200-2700 avro maaş alırdı, Danimarkada tibb bacıları aylıq 2700 avro maaş alırdı, eyni zamanda, günün 15.00-dan sonra işləmək üçün Avstriyada maaş bonusu verilir, bir terapevtin maaşı 4-5 min avro idi. Bu gün yəgin ki, inflyasiyanı nəzərə alaraq bu maaşlar dahada artıb.

Bütün bunları nəzərə alsaq, təxmin etmək olar ki, xaricdə çalışan həkimlərə ölkəmizdə necə şəraitin yaradılması tələb olunur ki, onlar öz vətənlərinə qayıdıb öz soydaşlarına qulluq etsinlər. Əsas odur ki, bu layihə uğurlu olsun və yeni nəsil peşəkar həkimlərimiz mövcud olsun.

Aynur Vəliyeva