Ötən gün, 4 dekabr 2024-cü il tarixdə, Azərbaycan Sağlamlıq və Termal Turizmə Dəstək Assosiasiyası və “Turan Qastroturizm Akademiyası” tərəfindən Türk Əməkdaşlıq və Koordinasiya Agentliyinin (TİKA) dəstəyi ilə Sumqayıt şəhərində şəhərin sosial-iqtisadi həyatında mühüm rol oynayacaq mərkəzin açılış mərasimi keçirilib.

Azərbaycan Sağlamlıq və Termal Turizmə Dəstək Assosiasiyasının sədri Ruslan Quliyev bildirib ki, Akademiya “Məktəb-Sənaye Əməkdaşlığı Sumqayıt Modeli” çərçivəsində, şəhərdə işsizliyin azaldılması və xidmət sektorunun inkişafına əhəmiyyətli töhfə verəcək strateji bir layihədir.

“TİKA-nın təmin etdiyi müasir mətbəx avadanlıqları və təchizat dəstəyi sayəsində, gənclərimizə beynəlxalq standartlara uyğun peşə təhsili vermək imkanına malik olacağıq”, – deyə Ruslan Quliyev qeyd edib.

Açılış mərasimində TİKA-nın rəhbəri cənab Serkan Kayalar iştirak edib.

R.Quliyev bildirib ki, tədbir, Türkiyə-Azərbaycan qardaşlıq əlaqələrinin təhsil və məşğulluq sahəsindəki əməkdaşlığının daha bir parlaq nümunəsi oldu.

“Akademiyamız xidmət sektorunda məşğulluğun artırılmasına töhfə verəcək, şəhərimizin qastroturizm potensialını inkişaf etdirəcək və eyni zamanda beynəlxalq standartlara uyğun təlim proqramları həyata keçirəcək.”