Ölkəmizə tez-tez gələn xaricilər deyirlər ki, hər dəfə gələndə şəhərimizdə yeni nəsə görürlər. Bəzən bir il ərzində şəhərimizdə o qədər yeni tikili, park, kafe yaradılır ki, bəzi küçə və rayonları tanımaq olmur. Əlbəttə ki, bu həm yerli əhali üçün, həmdə şəhərimizin qonaqları üçün çox sevindirici haldır.

Xüsusən qeyd edərdim ki, yeni parklarda kameraların quraşdırılmasının başqa bir önəmidə var, bu texnologiyalar, parkda istirahət edən uşaqların, gənclərin, qız və qadınların təhlükəsizliyinin təmin edilməsi üçün vacibdir.

Eyni zamanda, müşahidə kameraları vandalizmə meyilli şəxslərin parklarımızda quraşdırılan oturacaqlara, zibil yeşiklərinə, ağaclara zərər vurmasına mane olur.

Ölkə başçısının şəhərimizdə yeni yaradılan parkların açılışlarında ailəsi ilə birgə iştirakı isə paytaxtımızda və ölkəmizdə yaşıllıqların yaradılmasına və qorunmasına dövlət səviyyəsində verilən önəmə işarə edən mesajla yanaşı,  cəmiyyətimizə ötürülən daha bir önəmli mesaj – parkların ailəvi istirahət yeri olduğu və ailə ilə vaxt keçirməyin vacibliyidir.

Bu çox gözəl tendensiyalardır və onları inkişaf etdirib, qoruyub, davam etdirmək lazımdır.

Bəzən parklar yaradılır, ilkin mərhələdə yaşıllıqlara qulluq edilir, avadanlıqlara texniki dəstək göstərilir, lakin sonradan nəzarətdən çıxır və bərbad hala düşür.

Əvvəlcə kameralar sıradan çıxır, sonra isə artıq oturacaqlar, zibil yeşikləri və nəyi aparmaq olursa hər şey yox olur və ya nasaz vəziyyətdə salınır.

Bir nümunə kimi, avtobus dayanacaqlarında quraşdırılan monitorları, informasiya köşklərini, bəzi ödəniş terminallarını və hətta bankomatları da qeyd etmək olar.

Onların quraşdırılması böyük reklam kampaniyalarına səbəb oldu. Onlayn media, televiziya, qəzetlər bu avadanlıqlar quraşdırılanadək və quraşdırıldıqdan sonra bir müddət, onların quraşdırılmasının vacibliyindən, funksionallıqlarından, insanlara faydasından reportajlar və məqalələr yazırdılar.

Sonra isə onlar artıq gündəmdən düşdü, heç kəs maraqlamadı ki, dayanacaqlarda sanki bir müqavva kimi, duran bu monitorlar niyə işləmirlər və ya hara yox oldular?Bankomatların, telefon-avtomatların, informasiya köşklərinin təmizliyinə baxılırmı? Parklarda ki, kameraların istismar müddəti bitdikdən sonra onlar yenilənirmi? Oğurlanan oturacaqlar, zibil yeşikləri və s. qeri qaytarılırmı?

Bunları gördükdə istər-istəməz
ABŞ-ın 35-ci prezidenti Jon Kennedinin 1961-ci ildə tarixə həkk olunmuş innauqurasiya çıxışında dediyi sözləri yada düşür: “Soruşma ki, vətənin sənin üçün nə edə bilər, soruş ki, sən öz vətənin üçün nə edə bilərsən”.

Hər birimiz yaşadığımız evin həyətində, yerləşdiyi küçəsində, rayonunda gündə qarşılaşdığımız vandalizmə, oğurluğa və digər şər əməllərə qarşı sözümüzü desək vətənimiz qarşısında borcumuzu yerinə yetirmiş olarıq və dövlətimizin bizim üçün yaratdığı şəraitin davamlılığını və sabitliyini qorumuş olarıq, lakin biz bunu etmirik.

Atalarımız demişkən, “Bağa baxarsan, bağ olar, baxmazsan, dağ olar”. Bu atalar sözündə dağ “dərd” mənasında işlənib.

Yəni əgər biz bizə məxsus olanlara yaxşı baxsaq, onlar da yaxşı məhsul verər, ürəyimiz açılar, sevinərik. Yox, əgər yaxşı qulluq etməsək, onlar gözdağına çevrilərlər.

Aynur Vəliyeva