Bu gün Azərbaycanda Dövlət bayrağının yaranmasının 106-cı ildönümüdür. Azərbaycan Respublikasının Dövlət bayrağı 1918-ci il noyabr ayının 9-da Azərbaycan Demokratik Cumhuriyyətinin qərarı ilə qəbul edilib. 

Bu il Azərbaycan Dövlət Bayrağı Gününü tam başqa bir əhval ruhiyyə ilə keçirir, çünki artıq Dövlət Bayraq Meydanında dalğanan bayrağımız bərpa olunub.

Yenilənmiş bayrağın ümumi çəkisi 500 kiloqramdan artıq, eni 36 metr, uzunluğu 72 metrdir və Azərbaycan bayrağı artıq ikinci dəfə “Ginnesin rekordlar kitabı”na düşüb.

Beləliklə, bayramın sevinci Zəfər sevinci ilə qarışıb, işğal altında olan torpaqlarımız azad edilib və artıq bu torpaqlarda bərpa-quruculuq işləri aparılır.

Azərbaycan dövləti artıq bir daha təsdiq edib ki, bayrağımızın arxasında qəhrəman Azərbaycan ordusu, yenilməz Azərbaycan xalqı, güclü iqtisadiyyat və təbii sərvətlər və ən əsası, bu dövləti ustalıqla idarə edən qüdrətli və humanist dövlət başçısı var.

Qələbə sevincimiz kədər qatan Vətən uğrunda həyatlarını qurban vermiş şəhidlərimiz daim bizim qürur mənbəyimiz olaraq qalacaq, çünki məhz onların qəhrəmanlığı və fədakarlığı nəticəsində Azərbaycan qalibiyyətə nail olub və dövlətimizin şərəfli səhifələrini yazmağa müvəffəq olub. Hər birimiz Azərbaycan vətəndaşı olaraq şəhid anaları qarşısında baş əyirik, vətənə bu cür qəhrəman oğullar bağışladıqları üçün təşəkkür edirik.

Qalibiyyət dövlətimizin dahada güclənməsinə və regionda sülhün və əmin-amanlığın bərqərar olmasına imkan verdi, Azərbaycan dövləti yad əllərdən azad edilmiş torpaqlarına yeni həyat bəxş edir və vətəndaşlarımızın rifahının yüksəlməsinə nail olacaq.

Xalqımızın azadlıq məfkurəsinə, milli-mənəvi dəyərlərə və ümumbəşəri ideallara sadiqliyini nümayiş etdirən Azərbaycan bayrağının hər zaman zirvələrdə dalğalanmasını diləyirik.

Şair Cəfər Cabbarlı 1919-cu ildə Azərbaycan bayrağına sevgisini “Azərbaycan bayrağına” şeiri ilə ifadə edib:

Bu göy boya, Göy Moğoldan qalmış bir türk nişanı,— Bir türk oğlu olmalı! Yaşıl boya islamlığın sarsılmayan imanı,— Ürəklərə dolmalı! Şu al boya azadlığın, təcəddüdün fərmanı,— Mədəniyyət bulmalı!