Bu gündən etibarən Azərbaycanda unun topdansatış qiyməti 2,5 faizədək və ya 65-70 qəpik artıb. Qeyd edək ki, son iki ildə unun topdansatış qiyməti 35% azalıb, lakin çörəyin qiymətində 30 qəpik artım müşahidə olunur.

Bu xəbəri İqtisadiyyat Nazirliyi yanında Antiinhisar və İstehlak Bazarlarına Nəzarət Dövlət Xidməti paylaşıb.

Qurumun verdiyi rəsmi məlumata əsasən, ölkədə hazırda 50 kq-lıq unun topdansatış qiyməti 25,95-28,20 manat aralığında dəyişir. Ötən ay bu rəqəm 25,30-27,50 manat təşkil edib.

Unun qiymətinin artımı qaçılmaz olaraq çörəyin və digər undan hazırlanan qida məhsullarının, polufabrikatların və şirniyyatların qiymətinə öz təsirini göstərməlidir. Beləliklə, hazırda çörəyin aşağı qiymət seqmentinə aid olan növləri sayılan zavod çörəyinin və doğranmış çörəklərin qiyməti 55-95 qəpik arasında dəyişir.

Qeyd edək ki, ötən ilin oktyabr ayında 50 kq-lıq qablaşdırmada un kisəsinin topdansatış qiyməti 26,4-28,5 manat olub, o zaman Azərbaycanın bir sıra ticarət şəbəkələrində 650 qramlıq dairəvi (zavod) çörəyinin qiyməti 60 qəpikdən 55 qəpiyə düşüb. 2022-ci ilin oktyabr ayında isə unun topdansatış qiyməti 40-40,15 manat, standart çörəyin qiyməti isə 70 qəpik olub.

Göründüyü kimi, çörəyin qiymətinə təkcə unun topdansatış qiyməti deyil, enerji daşıyıcılarının və suyun artan tarifləridə təsir edir.