Həftəsonu Bakının mərkəzində yerləşən mollardan birində brend malların endirimlə satılan yarmarkasına getdim. İlk növbədə bəzi malların artıq ötən sezon deyil, ötən 5-10 illiyə aid olduğunu qeyd etdim. Sonra düşündüm ki, qaraj-da yarmarka keçirib orada 300-500 manatdan yuxarı qiymətə geyim satan şirkət gərək məkanı heç olmasa mağazaya oxşatsın ki, insan özünü second-hand-də alış-veriş etdiyi kimi hiss etməsin. Bəzi bahalı brend malları, xüsusən xəzləri, doğurdanda münasib qiymətə satılırdı. Sonda isə məlum oldu ki, istədiyim məhsulu yeni sezon kolleksiyasında 50% daha aşağı giymətə digər ticarət mərkəzində ala bilərəm.

Düzünü deyim nəsə almaq kimi bir planım yox idi, sadəcə baxmaq istəyirdim, bəlkə münasib qiymətə keyfiyyətli markalı geyimlərdən nəyisə gözüm tutar alaram. Yəgin bir çox qadınlar o anı hiss ediblər, bir dona, dəstə və ya xəzə baxdıqda beyində “Əsl mən istədiyimdir” kimi siqnal işə düşür. Bu ifadə ölçünün, rəngin, dizaynın, tərzin və qiymətin vəhdətini kəsb edir. Çox təəssüf ki, bu son zamanlar nadir hallarda mümkün olur.

Səbəb isə mağazalarımızda bəzən geyimlərin yalnız gənclər üçün və ya yaşlı qadınlar üçün nəzərdə tutulduğundandır. Yəni, yeni nəsil 45-55 yaşlı qadınlar gərək öz parametrlərinə görə gənclərə aid olan geyimlər alsınlar, bu isə bəzən gülünc görünür, və ya ölçüsü və fasonu ürəyləriycə olmayan donu və ya dəsti alıb dərzidə düzəliş etsinlər, bu isə əlavə xərc və vaxt itkisidir. Bir variant kimi dərziyə müraciət edib istədiyiniz modeli tikdirmək imkanı da var, lakin burada əl işi və son nəticə daim sual altındadır, çünki yaxşı dərzi tapmaqda başqa bir problemdir.

Misal üçün, müştəri gəlir küləklik gödəkçə almağa, ticarət mərkəzində bütün dükanlara baxır, lakin giymət, keyfiyyət, ölçü, rəng tələblərinə cavab verən məhsul tapa bilmir. Niyə? Çünki gödəkçələr belə kimi və ya dizə kimidir, ya bozarmış bir rəngdədir yadaki üzərində idman stili üçün yersiz olan parıltılı bəzəyi var, sonda normal küləklik tapdıqda isə onun uyğun ölçüsü olmadığını və ya aşağı qiymət seqmentinə aid olan xəzin qiymətində olduğunu görür.

Bu o deməkdir ki, bazarımıza gətirilən malların çeşidi məhduddur, çünki eyni brend markalarının və ya mass market məhsullarının online platformalarda daha münasib qiymətə və geniş çeşiddə mallarını almaq mümkündür. Bütün dünyada brend mağazalar ötən sezonun mallarını yüksək endirim faizi ilə satırlar, yerli mağazalarımızda isə real endirimlər əks olunmur. Bunu Türkiyədə və digər ölkələrdə, onlayn dükanlarda alış-veriş edən insanların əksəriyyəti bilir.

Bəzi brend mallarına gəldikdə isə demək lazımdır ki, bu malları ölkəmizə gətirən şirkətlər yerli əhalinin konservativliyini nəzərə alaraq yeni kolleksiyalardan olan mallarla yanaşı klassik modelləri, dünyada artıq gəbul edilmiş və daim dəbdə olan ağ, qara, bej, qəhvəyi, bordo, boz, göy rənglərinin bütün çalarlarının və bu modellərin üzərində olan bəzəklərin görünüşünə diqqət yetirsələr satışları daha çox olar.

Sonda isə demək istərdim ki, əsas geyimin brend marka olması deyil, onun əyninizdə necə oturması və özünüzü o geyimdə necə hiss etməyinizdir.

Aynur Vəliyeva