Ötən gün Dənizkənarı Milli Parkda gəzintiyə çıxdım. Nələr gördüm? Elə bilməyin ki, su pərisi, əjdaha və ya Neptunun özünü görmüşəm. Daha önəmli məsələdir.

Qulaqcıqları taxıb musiqi dinləyərək burada gəzməyi çox sevirəm, insanın sözün əsl mənasında ruhu dincəlir. Təmiz dəniz havası, yaşıllıqlar, sakitlik, gözəl mənzərə…

Bu vərdişim, başqa yerə getməyə icazə verilməyən, pandemiyə dövründə yarandı və o vaxtdan bəri boş vaxtım olduqca piyada, bəzən Azneft meydanınadək, gəzirəm.

Bu gəzinti zamanı məni yeganə narahat edən amil bulvarın bəzi hissələrində dənizdən gələn nəfəs kəsən pis goxu idi. Bu dəfə nəhayət bu problemin çözüldüyünu görüb çox sevindim.

Bu ərazidə gəzintiyə çıxan şəhər sakinlərinin çoxu yəgin ki, Xəzər dənizinin suyunun qısa müddətdə nə qədər çəkildiyinə nəzər yetiriblər.

Nəticədə, suyun altından gözəl mənzərəni pozan platforma və dəmir qalıqları, dəniz dibinə çökən tullantılar üzə çıxmışdı.

Son bir ay ərzində bu problemlər həll olunub. Tullantılar təmizlənib və dəniz sahili qum və çay daşları ilə bəzədilib.

Hesab edirəm ki, buna görə Bakıda keçirilməsi gözlənilən COP29-a təşəkkürümüzü bildirməliyik, çünki ətrafda salınan və yüksək səviyyədə qulluq edilən yaşıllıqlarla yanaşı, bu xoşagəlməz mənzərə son 5 ildir ki, müşahidə olunurdu, lakın bulvarın bu hissəsinə az adam gəldiyinə görə önəm verilmirdi.

Belə qənaətə gəlmək olar ki, beynəlxalq tədbirlərin ölkəmizdə keçirilməsinin bu cür daxili problemlərin həlli üçündə böyük faydası var. Beynəlxalq tədbirlərin ölkə ərazisində coğrafiyası genişləndirilsə isə yəgin ki, daha çox problemlərimiz həll olunar.

Adətimizə görə qonaq gələndə evimizdə bir başqa təmizlik işləri görürük. Qonaq tez-tez gəlinən evdə isə artıq təmizlik daimi olur.

Aynur Vəliyeva