“Nizami” kinoteatrında “Cığır” mənəvi dəyərlərin inkişafına dəstək ictimai birliyinin “Elm ümmandır” təhsil təqaüdü proqramının “Qüvvət elmdədir” adlı növbəti sosial hesabat tədbiri keçirilib.

Millət vəkilləri, dövlət və özəl sektorlarının nümayəndələrinin iştirakı ilə keçirilən tədbir çərçivəsində birlik üzvləri 9 il ərzində həyata keçirdikləri “Qutabdan kitaba”, “Perspektiv”, “Rəngarəng”, “Mülk” və s. sosial sahibkarlıq layihələri çərçivəsində və ianələr vasitəsi ilə topladıqları vəsaitlər hesabına təhsil almalarına dəstək göstərdiyi atasız uşaqlar haqda bəhs edildi.

Təşkilatçılar və həyata keçirdikləri sosial layihələrə həsr edilmiş bir neçə videoçarxı və hesabat təqdimatlarını tədbir iştirakçılarına nümayiş etdilər.

Tədbirdə çıxış edən birliyin sədri Yeganə Mirzəyeva rəhbərlik etdiyi qurumun üzvlərinin məqsədinin təcrübəsini, pozitiv enerjisini və sevgilərini yaxşılığa inamını itirmiş insanlarla paylaşmaqdır.

“Mən düşünürəm ki, ən ülvi hiss mərhəmətdir. Bu gün biz bu qədər uşağa təhsil almağa kömək etməyi bacarmışıqsa deməli yardımsevər insanlar var və onlar çoxdur. Biz dəstək göstərdiyimiz uşaqlara əmanət deyirik və əmanətlərimizin təhsillərini bitirdikdən sonra bizimlə yanaşı könülü fəaliyyət göstərməsi bizi sevindirir. Son bir ildə biz bir çox təhsil almaq istəyən uşağa dəstək olmuşuq, komandamızın üzvlərinin sayı artdı. Növbəti ildə biz Bakı şəhər icra hakimiyyətinin dəstəyi paytaxtımızın rayonlarında daha çox satiş yarmarkalar keçirərək xeyirli işlərə vəsilə olmağa hazırlaşırıq”, – deyə o qeyd edib.

Daha sonra birliyin dəstəyi ilə bu il ali məktəblərə yüksək balla qəbul olunan “əmanətlərə” sertfikatlar təqdim edən qonaqlar onlara ürək sözlərini deyərək təbrik etdilər.