Son zamanlar “Baktelekom”-dan aldığımız internetimizin keyfiyyəti suallar doğurmağa başlayıb. Bu sualları dahada aktuallaşdıran məqam isə bu ilin avqust ayından etibarən dövlət provayderlərinin internet tariflərini artırması elanıdır.

Adətən qiymət artırıldıqda müştəri xidmətin keyfiyyətinin artırılmasını gözləyir, lakin bizdə həmişə tam tərsi yaşanır.

Xidmət səviyyəsi

Hər hansı yeni texnologiyaya keçdikdə, internet tarifi artırıldıqda ilkin mərhələdə istifadəçilər yeniliyin şokunu yasayırlar. Saatlarla müştəri xidməti ilə əlaqə saxlayıb, növbə gözləyib ödədikləri pulun qarşılığında normal xidmət səviyyəsi tələb edirlər və nəticədə məlum olur ki, ya yeni texnologiyanın sazlanması üzrə işlər aparılır və ya müvafiq əlavə avadanlıq quraşdırılmalıdır.

Bir həftəyə yaxın müddətdən sonra dözümlü müştəri pulunu ödədiyi xidmətdən nəhayət normal istifadə edə bilir.

İnternetin sürəti

Hər dəfə olduğu kimi, bu dəfədə eynisini yaşayırıq. Yəni, avqust ayından etibarən artırılmış tarif ilə 27 manat aylıq ödəniş edirik və GPON texnologiyası üzərindən təklif edilən 100 mbit/s əvəzində 20 Mbit/s internet və stasionar telefon xidməti alırıq.

Tarif qarşılığında seçim çeşidi

Bizim ailənin 100 Mbit/s internetə, məhz GPON texnologiyasına ehtiyacımız yoxdur, sadəcə bu ən minimal tarif paketi və bu qiymətə yeganə təklif olunan internetə qoşulma texnologiyası olduğu üçün və yaşadığımız binada geniş çeşiddə internet provayder seçimimiz olmadığı üçün məcburən qoşuluruq.

Bu bizim üçün problem deyil, təki internet bağlantısı normal səviyyədə olsun. Lakin internet bağlantısı ödədiyimiz tarif qarşılığında gözləntilərimizə cavab vermir. Gün ərzində bir neçə dəfə qısa kəsilmələr ola bilər, sürət çox aşağı düşə bilər və digər aşağı keyfiyyətli internetə işarə edən hallar yaşana bilər.

Problemin səbəbi və səbəbkarı

“Baktelekom” problemin bizim köhnəlmiş modemimizdə olduğunu bildirir. Modem isə, prosedura görə, provayder tərəfindən quraşdırılmalıdır. Modemlərin nə vaxt yeniləcəyi ilə bağlı sual verdikdə isə məlum oldu ki, planda var, lakin işlərin nə vaxt başlanacağı ilə bağlı məlumat yoxdu.
Yəni ki, modem yenilənmədən tarif artırılıb, internetin sürəti isə qiymət qarşılığında təklif ediləndən beş dəfə aşağıdır.

Modemə gəldikdə isə məlum oldu ki, modem 5GHz tezliyini dəstəkləməlidir ki, istifadəçi ödədiyi tarif qarşılığında təklif edilən 100 Mbit/s internet sürətindən və stasionar telefondan istifadə edə bilsin.

Yeni modemin quraşdırılması üçün 155 Qaynar Xəttinə müraciət edib öncədən sifariş etmək lazımdır.

5 GHz Wi-Fi nə üçün nəzərdə tutulub?

Onuda qeyd edək ki, bütün mobil cihazlar 5 GHz Wi-Fi şəbəkəsinə qoşula bilmir. Yalnız bu diapazonda əməliyyatları dəstəkləyən qurğular (smartfon, planşet, noutbuk) şəbəkəyə qoşula biləcək. Cihazınız 5 GHz tezlik diapazonunu dəstəkləmirsə, o, 2,4 GHz Wi-Fi şəbəkəsində işləyə bilər.

2.4 GHz və 5 GHz diapazonları arasındakı əsas fərq simsiz əlaqənin sürəti və şəbəkənin diapazonunda (əhatə dairəsi) fərqdir: daha böyük diapazon lazımdırsa, 2.4 GHz istifadə edin; daha sürətli bağlantılar prioritetdirsə, 5 GHz istifadə edin.

2.4 GHz diapazonu yüksək keçid genişliyi tələb etməyən müştəriləri birləşdirmək üçün ideal həlldir. Məsələn, veb-sörfinq üçün uyğun bir seçimdir.

Digər tərəfdən, 5 GHz diapazonu yüksək bant genişliyi olan müştəri cihazları və onlayn oyun və ya HDTV üçün daha uyğundur.

Aynur Vəliyeva