Bu gün, 20 sentyabr tarixində, Azərbaycan xalqı qürurla daha bir bayramı qeyd edir – Dövlət Suverenliyi Gününü.

Bir çoxlarında sual yarana bilər ki, niyə məhz bu gün? Çünki 2023-cü il 20 sentyabr tarixində Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması və Ermənistan silahlı qüvvələrinin qalıqlarının tərksilah edilərək torpaqlarımızdan çıxarılması, həmin ərazilərdə Azərbaycan konstitusiya quruluşunun bərpa edilməsi məqsədilə 23 saat davam edən antiterror əməliyyatı uğurla başa çatmışdir.

Rəşadətli Azərbaycan Ordusu qarşısına qoyulmuş bütün vəzifələri yüksək peşəkarlıqla yerinə yetirmişdir və növbəti parlaq Qələbə nəticəsində Azərbaycan Respublikasının suverenliyi tam bərpa edilmişdir.

Ermənistanın yeni işğalçılıq planlarına, növbəti hərbi təcavüz cəhdinə və ardıcıl təxribatlarının həyata keçirilməsinə imkan verilməmişdir.

Beləliklədə, 2020-ci il sentyabrın 27-də başlamış 44 günlük Vətən müharibəsində əldə edilmiş Zəfərimizə yekun möhür qoyulmuşdur, ötən ilin 20 sentyabr tarixində.

Azərbaycan öz torpaqlarını 30 illik işğaldan azad edərək ərazi bütövlüyünün bərpasına və BMT Təhlükəsizlik Şurasının qətnamələrinin yerinə yetirilməsinə nail olmuşdur.

Nəticə olaraq biz bu gün müstəqil dövlətə sahibik, qəhrəman əsgər və zabitlərimizin, şəhidlərimizin qanı yerdə qalmadı, ərazi bütövlüyümüz təmin edildi, suverenliyimizi əldə etdik.

Azərbaycan prezidenti İlham Əliyevin sərəncamına əsasən artıq hər il sentyabrın 20-si Azərbaycanda iş günü olan Dövlət Suverenliyi Günü kimi qeyd ediləcək.