Dərs ili başladıqdan bəri hər gün sosial şəbəkələrdə Bakımetropolitenin stansiyalarında pik saatlarında yaşanan izdihamlar, avtomobil yollarında tıxac və dayanacaqlarda gözləyən sərnişinlərin narazılıq bildirən videoları paylaşılır.

Bu problemin əslində həlli var, lakin bəzi çətinliklər ola bilər, çünki vətəndaşlarımızın bu cür düşüncə tərzinə alışması lazımdır.

Belə ki, çətində olsa işçilərin daimi yaşayış yerlərinə görə lokalizasiyasına ehtiyac var. Bu prosesdə şirkət, bank və ya dövlət qurumu işçi bazasını təhlil edib ofisini işçilərinə və ya işçisini ofisinə yaxın edə bilər.

Bunun üçün dövlət qurumları əmək haqqı və iş şəraiti eyni səviyyədə saxlamaqla işçilərin mübadiləsini apara bilər.  Əvəzolunmaz işçilər yaşayış yerini ofisə daha yaxın edə bilər.

Ali təhsil müəssisələrinin bildiyimizə görə təhsil alanlara daha yaxın edilməsi məsələsi nəzərdən keçirilir. 

Bu gözəl bir təcrübədir, çünki regionlardan Bakıya təhsil almağa gələn tələbələrin xərcləri ildən ilə artır,  bura ev kirayəsi, kommunal ödənişlər, qidalanma, rayona gedib-gəlmək xərcləri daxildir. Nəzərə alsaq ki, bütün tələbələrin işləmək imkanı yoxdu bu ailələrə müəyyən maddi yük yaradır.

Bundan başqa, ölkə üzrə işçi bazası mövcud olduğu halda kadrlar yaşadıqları yerə yaxın bir yerdə işlə təmin oluna bilərlər və ya məsafədən işləyə bilərlər.

Əks halda paytaxtımızda yaşanan nəqliyyat problemlərinin başqa həlli yolu görünmür. Hətta yeni yolların tikintisi və marşrutların dəyişməsi belə hazırda tıxac problemini həll etmir, əksinə dahada gəlizləşdirir.

Şəxsi təcrübəmdən deyə bilərəm ki, şəhərdə yaşadığıma baxmayaraq hər gün iş yerimə çatmaq üçün iki nəqliyyat dəyişərək 1 saat səhər və 2 saatadək axşam vaxt itirmiş olduğum vaxtlar olub. İşləyən insan üçün isə vaxtın böyük önəmi var. Bu bir-iki saat insanın övladına ayırdığı vaxtdan, istirahət, özünə baxım, ev işləri, mütaliə vaxtından çıxılır.

Nəticə olaraq daim stressli, narazı və depressiv toplu ilə üz-üzə qalırıq, bu da öz növbəsində iş yerində məhsuldarlığa, ailədə isə münasibətlərə mənfi təsir göstərir.

Aynur Vəliyeva