İcbari Tibbi Sığorta (İTS) Agentliyi mütəmadi olaraq vətəndaşları icbari tibbi sığorta zərfinə daxil olan müayinələr və əməliyyatlar haqma məlumatlandırır.

Son zamanlar icbari tibbi sığorta zərfinə daxil olan aşağıda göstərilən əməliyyatlar və diaqnostik müayinələr haqda məlumat verilib.

İcbari tibbi sığorta zərfinə daxil olan əməliyyatlardan biridə xalq arasında “dovşan dodaq” və “qurd ağız” kimi tanınan, anadangəlmə dodaq-damaq yarıqlarının əməliyyat yolu ilə aradan qaldırılır. Sözügedən anomaliyaların yaranmasının fərqli səbəbləri olsa da, əsasən genetik və xarici faktorların birgə təsiri ilə əlaqədar olduğu düşünülür. Hamiləlik dövrünün problemli keçməsi (davamlı stres faktorların təsiri və s.), qohum evliliyi, hamiləlik dövründə ananın zərərli vərdişləri, bəzi dərman preparatlarının qəbulu adıçəkilən inkişaf qüsurlarının yaranmasında əsas səbəblər arasında yer alır.

Hazırda icbari tibbi sığorta çərçivəsində miomektomiya əməliyyatı üç müxtəlif üsulla vətəndaşlara ödənişsiz həyata keçirilir: ənənəvi açıq miomektomiya (laparotomiya), laparoskopik miomektomiya və histeroskopik miomektomiya .

Hər bir üsulun seçimi xəstənin ümumi sağlamlıq vəziyyəti, xəstəliyin klinikası, miomaların sayı, ölçüsü və yerləşməsi kimi amillər nəzərə alınaraq həkim tərəfindən təyin edilir.

Cərrahi prosedur sayılan sirkumsiziya (sünnət) əməliyyatı cinsiyyət orqanının (pülüyün) üzərində və onu əhatələyən dəridən bir hissəsinin kəsilib çıxarılmasıdır. Prosedur icbari tibbi sığorta hesabına tibbi göstəriş əsasında həyata keçirilir.

Sünnət üçün əsas tibbi göstərişlərə fimoz (pülük dərisinin daralması), parafimoz (pülük dərisinin sıxılması) və balanopostit kimi tez-tez rast gəlinən iltihabi xəstəliklər daxildir. Sünnət həmçinin sidik yollarının infeksiyalarının, o cümlədən insan immunçatışmazlığı virusu (HİV) və cinsiyyət orqanı xərçənginin riskini azaltmaq üçün profilaktik tədbir kimi həyata keçirilə bilər.

Əməliyyatdan öncə müayinə, laborator analizlər, əməliyyat zamanı istifadə olunan dərman və tibbi sərf və prosedur zamanı istifadə olunan anesteziya xidməti icbari tibbi sığorta ilə qarşılanır.

Maqnit rezonans tomoqrafiya (MRT),  kompüter tomoqrafiyası (KT),  kolonoskopiya, qastroskopiya, kolposkopiya, histeroskopiya, mammoqrafiya, toxuma nümunələrinin mikroskopik analizi, onkomarkerlərin qanda təyini və  pap smear testi kimi diaqnostik müayinələrdə icbari tibbi sığorta zərfinə daxildir.