Bu günlərdə prezident İlham Əliyev və Birinci vitse-prezident Mehriban Əliyevanın Toğanlı-Kəlbəcər-İstisu yol layihəsi çərçivəsində tikilən tunelin və yolun bir hissəsinin şəkillərinə baxdım. Əsl Formula 1 trasıdır.

Yol deyirsiz – təzə şüşə kimi, mənzərə deyirsiz ondanda gözəl, təbiətinə də söz ola bilməz. Nəzərə alsaq ki, yaxınlıqda “İstisu” müalicəvi istirahət kompleksi tikilir, regionun turizmin şahı olacağı ehtimalı dahada artır.

Daha bir üstünlüyü də, Bakı sakinlərinin Formula 1 ərəfəsində ki, “əzablı yollarla” yürüşləri başa çatar. beləliklədə bir oxla 5 hədəf vurulmuş olar:

• Bütün dünya Azərbaycanın qısa bir zamanda Qarabağda gördüyü quruculuq işləri ilə və eyni zamanda işğal zamanı baş vermiş vandalizmin izləri ilə tanış olar
• Formula 1-in coğrafiyası genişlənməklə yanaşı tədbirə yeni nəfəs və həyəcan qatılar
• müalicəvi turizmin inkişafına əlavə töhvə verilər
• Bakı şəhərinin mövsümi nəqliyyat problemlərinin biri azalar və əhali məmnuniyyəti artar

Hazırda işğaldan azad olunmuş ərazilərin yenidən qurulması və bərpası layihəsi çərçivəsində Toğanalı-Kəlbəcər-İstisu avtomobil yolunun tikintisi sürətlə davam etdirilir. Mövcud yolun uzunluğu 100, yeni yolun uzunluğu isə 82 kilometrdir. Yolda artıq bir sıra işlər tamamlanıb.

Yolun 34,9-35,4 kilometrliyindəki tunelin uzunluğu 500, hərəkət hissəsinin eni isə 8 metrdir.

Layihə üzrə yolboyu ümumi uzunluğu 2968 metr olan 6 qovşaq yenidən qurulub. Ümumi uzunluğu 5600 metr olan 36 bağlantı yolunun tikintisi də icra edilməkdədir.

Göygöl və Kəlbəcər rayonlarını birləşdirən avtomobil yolunun uzunluğu Toğanalı-Kəlbəcər hissəsində 56 kilometr, Kəlbəcər-İstisu hissəsində isə 26 kilometr təşkil edir.

Toğanalı-Kəlbəcər yolunun 13-cü kilometrliyindən Murovdağ silsiləsi başlanır və yüksəklik 1700 metrdən 3260 metrə qədər artır. Bu hissədə dünyanın əz uzun avtomobil tunellərindən biri olacaq Murovdağ tunelinin inşası davam etdirilir. Tunel bir istiqamət üzrə 2 hərəkət zolaqlı və 10 metr enində olacaq. Bundan əlavə 561,2 metr, 626,9 metr, 500 metr və 947,9 metr uzunluğunda 4 tunelin tikintisi də həyata keçirilir. Uzunluğu 23,4 kilometr olacaq Murovdağ tunelinin daxilində sağ və sol hissələri birləşdirən bağlantı yolların inşası istiqamətində işlər davam etdirilir.

Ümumilikdə Toğanalı-Kəlbəcər-İstisu avtomobil yolunun tikintisinin 67,5 faizi tamamlanıb.

Qeyd edək ki, Toğanalı-Kəlbəcər-İstisu avtomobil yolu başlanğıcını Göygöl rayonunun Toğanalı kəndindən götürməklə işğaldan azad edilmiş Kəlbəcər rayonunun ərazisindən keçir. Beləliklə, bu yol bir çox yaşayış məntəqələri ilə yanaşı, rayon mərkəzinə və məşhur İstisu ərazisinə qədər rahat gediş-gəlişi təmin edəcək.