Kəkələmə nitqin tempo-ritmik tərəfinin pozulmasına aid olub, nitq aparatının əzələlərinin qıcolma spazmlarının nəticəsində nitqdə fasilələrin, təkrar olunmaların, uzadılmaların müşahidəsidir.

Səhiyyə Nazirliyi Psixi Sağlamlıq Mərkəzinin aparıcı loqopedi Aygün Ələkbərova nazirliyin rəsmi “Instagram” hesabında onuda qeyd edib ki, uşaqlarda kəkələmənin əsas səbəbi beynin müəyyən mərkəzlərində həddindən artıq yüksək aktivlikdir.

“Bu aktivliyin yaranmasının dəqiq səbəbləri bu gün də məlum deyil. Həkimlər kəkələmənin inkişafı üçün yalnız risk qruplarını müəyyən edirlər. Bura qıcolmalara meyillilik, sinir sisteminin həssaslığı və s. aid edilir”.

A.Ələkbərova qeyd edib ki, genetika sahəsində aparılan son araşdırmalara görə, irsi kəkələmə bir ailənin bir neçə nəslin nümayəndələrində özünü göstərə bilər:

“Uşağın mərkəzi sinir sistemi, nitq aparatının inkişafının zəifliyi olduğu hallarda irsi kəkələmə müşahidə edilir. Kəkələmə oğlanlarda qızlara nisbətən 4 dəfə artıq müşahidə olunur”.

Ekspert qeyd edib ki, qız və oğlanların nitqlərinin arasında fərq bir az mübahisəli məqamdır, lakin müəyyən fərqlər mövcuddur.

“İlk öncə oğlan və qızların fizioloji inkişafının xüsusiyyətlərindən asılıdır. Qızlarda baş beyin qabığındakı nevronlararası əlaqələr nitqə cavabdeh olan bölgələrdə daha sürətli formalaşır. Oğlanlar qızlara nisbətən gec danışmağa başlayırlar, təxminən 2,5-3 yaşa yaxın”.

A.Ələkbərova bildirib ki, 4-6 yaşlı qızlar daha yaxşı danışırlar, şəkil çəkirlər:

“Amma həmişə istisnalar mövcuddur. Məktəb dövründə artıq oğlanlar məntiq və təfəkkürdən istifadə edirlər. Onların riyazi qabiliyyətləri daha çox inkişaf edir. Qızlara isə hekayələr, mətnlər danışmaq, şeirlər əzbərləmək daha asan olur”.

Loqoped vurğulayıb ki, oğlan və qızlar arasında nitqin başa düşülməsində də fərqlər müşahidə olunur:

“Qızlar emosional nitqi daha yaxşı qavrayırlar, oğlanlar isə qısa və lokanik nitqi. Qızlar üçün hisslər və duyğular vacibdir. Onlar böyüklərin nitqində də bunu hiss etməyə çalışırlar. Oğlanlar isə danışarkən konkret və qısa danışmağa daha çox üstünlük verirlər”.