Yeni ixtisaslar növbəti illərdə dövrün reallıqlarına uyğun olaraq yaradılacaq.

Trend xəbər verir ki, bunu təhsil naziri Emin Əmrullayev “Yaşıl artım gündəliyində təhsil” mövzusunda konfransda çıxışı zamanı deyib.

Onun sözlərinə görə, növbəti illərdən təhsil sistemində innovativ yeniliklər tətbiq olunacaq.

“Təhsil ictimaiyyəti olaraq yenilənməyə hər zaman açıq olmalıyıq. Təhsilin kökündə dayanan fundamental elmlərdir, məhz inkişafa aparan bu elmlərdir. Dövrün reallıqlarına uyğun olaraq yeni ixtisasların açılmasını da görəcəyik”, – deyə nazir əlavə edib.

O bildirib ki, Azərbaycanın “yaşıl” enerjiyə keçməsi və COP 29-un ölkəmizdə keçirilməsinin önəmli olduğunu düşünürəm. Çünki bu, həm iqtisadi, həm də gündəlik həyatda müəyyən davranış fərqliliyinə gətirir.

“Düşünürəm ki bunu təhsil vasitəsilə dəyişə bilərik. Bu məsələ bir neçə istiqamətdə özünü göstərir. Birinci məqam vətəndaşın məsələyə səriştəli yanaşmasıdır. İkinci məqam bacarıqlardır ki, bu da təhsillə əlaqəlidir. Səriştəsiz yanaşma bacarıqlarla bağlıdır ki, bu, özünü həm peşə, həm də ali təhsil sistemində büruzə verir. Üçüncü istiqamət isə daha çox elm və innovasiya ilə əlaqəlidir. Bu məqamda növbəti illərdə biz milli təhsil sistemi olaraq innovasiyalardan kənarda qalmamalıyıq”.

Milli Məclisin Elm və Təhsil komitəsinin sədri Bəxtiyar Əliyev konfransda çıxışı zamanı deyib ki, çox vacib məsələlərdən biri “yaşıl” keçid üzərindən olan yeni çağırışlardır. Çünki hər hansı ixtisas deyil, ixtisasların özündə “yaşıl” dəyərlərin formalaşdırılması önəmlidir.

Komitə sədrinin sözlərinə görə, bu təfəkkürə malik, məsuliyyət daşıyan gələcək nəsillərin də hüquqlarını təmin etməklə, iqtisadiyyatımızı təbiətin qorunması, tullantısız iqtisadiyyatın yaradılmasına istiqamətlənən qərarlar qəbul ediləcək.

O bildirib ki, Azərbaycan təhsil sahəsində bu çərçivədə qanunvericilik də daxil olmaqla bir sıra addımlar atıb:

“Bu işlər sürətlə davam edəcək. Əlbəttə, bu, təkcə təhsil sahəsində deyil, cəmiyyətdə də öz əksini tapmalıdır. “Yaşıl” cəmiyyətin formalaşdırılması bütün tərəflərin birgə məsuliyyəti əsasında zəruri qərarlar qəbul etməsindən keçir. Bu istiqamətdə kifayət qədər işlər gedir. Ölkə başçısı da dəfələrlə öz çıxışlarında bu məsələyə toxunub. Fakt olaraq qarşımıza qoyulan hədəflərə çatmaq üçün fəaliyyət planı hazırlanır. Həmin fəaliyyət planı bizə hədəflərə qısa zamanda çatmağa imkan verəcək”.