Bakıda Dənizkanarı Bulvarda daha bir beynəlxalq idman tədbiri keçiriləcək.

Azərbaycan Gimnastika Federasiyasının paylaşdığı məlumata əsasən, paytaxtda “Gimnastika hamı üçün” mövzusunda 2-ci Bakı Beynəlxalq Çelenc təşkil olunacaq. Tədbir iyunun 1-2-də baş tutacaq.

Yaşından və fiziki hazırlıq səviyyəsindən asılı olmayaraq bütün insanları birləşdirəcək bu gimnastika bayramında Azərbaycanın müxtəlif bölgələrindən, həmçinin xarici ölkələrdən, ümumilikdə, 60-a yaxın komanda iştirak edəcək.

İştirakçılar iki yaş kateqoriyası – 50 yaşdan aşağı və 50 yaşdan yuxarı proqramları üzrə çıxış edəcəklər. Bu möhtəşəm tədbir gimnastikanın sadəcə idman növü deyil, həm də sağlam həyat tərzi nümunəsi və əyləncə forması olduğunu bir daha sübut edəcək.

Əsl festival ab-havası yaşadacaq bu tədbir ustad dərsləri, komandaların rəngarəng yürüşləri, hər yaş qrupunun zövqünə xitab edəcək əyləncə proqramları ilə yadda qalacaq.

Uşaqların Beynəlxalq Müdafiəsi Günündə start götürəcək festival Qala şou ilə davam edəcək.