Lənkərandakı zəlzələdən sonra bir sıra xırda təkanlar qeydə alınıb.

Məlum olduğu kimi, mayın 11-də Lənkəranda 5,3 bal gücündə zəlzələ olub. Ocağı 20 kilometr dərinlikdə yerləşən zəlzələ episentrdə 6 bala yaxın, Lənkəran, Lerik, Yardımlı, Cəlilabad, Astara, Neftçala, Masallı, Biləsuvar, Saatlı, Salyan, Beyləqan, İmişli, Füzuli və digər rayonlarda 5-3 bala qədər hiss olunub.

Baş verən zəlzələ Qarabağda da hiss olunub. Amma ciddi dağıntı qeydə alınmayıb və seysmoloji xidmət əhalini narahat olmaha çağırıb, çunki güclü zəlzələ gözlənilmir.

Azərbaycan Milli Elmlər Akademiyasının (AMEA) prezidenti, akademik İsa Həbibbəyli Bakıda “Qafqazda Seysmik Təhlükə Yenilikləri və Müasir Mühəndislik Təcrübələrinin nəticələri” mövzusunda keçirilən beynəlxalq konfransda bildirib ki, erməni işğalından azad edilmiş ərazilərimizdə 20-dən çox seysmoloji stansiya dağıdılıb.

Onun sözlərinə görə, artıq seysmoloji stansiyaların qurulması istiqamətində işlər aparılır.

“Şuşanın Daşaltı kəndi ərazisində birinci seysmoloji stansiyada işlər başa çatmaq üzrədir. Bir aya qədər işləri tamamlayıb Qarabağda ilk seysmoloji stansiyanın açılışını edəcəyik”, – deyə o qeyd edib.

Konfrans zamanı Qafqazda son seysmik məlumatların toplanması və təhlili, müasir tikinti normalarında konseptlər, zəlzələ kataloqunun təkmilləşdirilməsi, seysmik metodlar və təhlükənin qiymətləndirilməsi tələbləri və s. mövzularda müzakirələr aparılacaq.