Ailə sirlərinin, çətin həyat şəraitində yaşayan uşaqların hekayələrinin, şəxsi məlumatların yayımlanması qanunvericiliyin və etik prinsiplərin tələblərinin pozulmasına, bu da öz növbəsində yanlış düşüncələrin, davranış pozuntularının yaranmasına, şəxsi həyata qanunsuz müdaxilənin, hüquq pozuntularının norma kimi təbliğinə yol açır.

Trend xəbər verir ki, bu fikirləri Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Bahar Muradova mayın 3-də keçirilən “İctimai proseslər media müstəvisində” mövzusunda forumda çıxışı zamanı səsləndirib.

O bildirib ki, cinayət törədən və ya cinayətə məruz qalmış uşaqlarla bağlı xəbərlərin yayılmasında xüsusi yanaşma lazımdır:

“Media məhsulları elə bir məhsuldur ki, o sosial şüura, düşüncəyə, mədəniyyətə təsir göstərir”.

Təbirdə çıxış edən, Milli Məclisin deputatı, Ailə, qadın və uşaq məsələləri komitəsinin sədri Hicran Hüseynova öz növbəsində bildirib ki, ailə dəyərlərimizin təbliğində, qadın və uşaq hüquqlarının müdafiəsində medianın üzərinə böyük iş düşür. Lakin bəzən bu və ya digər problemin işıqlandırılması zamanı səhvlərə yol verilir. Uşaqların üzü göstərilir, ev ünvanları, əsl ad və soyadlar, oxuduqları məktəb, iş yerləri dəqiqliklə göstərilir.

“Elə bu günlərdə baş vermiş bir cinayət hadisəsi ilə bağlı jurnalist orada olan uşaqlardan müsahibə götürür. Uşaqlar da bütün detalları ilə hadisəni danışırdılar. Bu, nə qədər düzgündür? Bəzən jurnalistlər bilməyərəkdən cəmiyyətin qadın və kişi stereotipləri haqqında görüşlərini bölüşür. Çox təəssüflər olsun ki, bəzən sensasiya, reytinq üçün xəbərlər paylaşırlar.

Əfsuslar olsun ki, bir çox hallarda sosial-məişət mövzulu proqramlarda, xəbər və ya məqalələrdə yalnız cəmiyyətin neqativ hissəsi nümayiş olunur. Halbuki bizim çox sayda nümunəvi ailələrimiz var. Düzdür, ailələrin problemlərini işıqlandırmaq lazımdır, lakin balans pozulmamalıdır”, – deyə Milli Məclisin deputatı qeyd edib.

H.Hüseynova qeyd edib ki, ən təhlükəli məsələlərdən biri də internetin, sosial şəbəkələrin çox sürətlə ailələrə daxil olmasıdır:

“Bu da qarşısıalınmaz bir prosesdir. Biz görürük ki, insanlar öz ailə üzvləri ilə müqayisədə virtual məkanda daha çox vaxt keçirirlər. Bu isə insanları bir-birindən uzaqlaşdırır, övlad – valideyn ünsiyyətində soyuqluq yaradır. Xüsusən də bu böyüməkdə olan gənclərimizə, onların psixikasına mənfi təsir göstərir, asılılıq yaradır. Eyni zamanda, milli-mənəvi dəyərlərin deqradasiyasına səbəb olur”.

H. Hüseynova onuda qeyd edib ki, “informasiya cəmiyyəti” termini eyni zamanda, müasir sivilizasiyanı ifadə etmək üçün istifadə olunur. Müasir insanın varlığını televiziya, internet, mətbuat və digər informasiya mənbələri olmadan təsəvvür etmək mümkün deyil.

O bildirib ki, hazırda media sosial təcrübənin əsas ötürücüsüdür, ona görə də sosiallaşma prosesində medianın fəaliyyəti çox vacibdir.

“Bu baxımdan da bugünkü mövzu xüsusi əhəmiyyət kəsb edir. Bütün növ informasiya məhsullarının ailə institutuna, xüsusi ilə də uşaq və gənclərə mənfi təsirlərinin aradan qaldırılması məsələsi bir çox ölkələrdə aktualdır. Azərbaycanda bununla bağlı aidiyyəti qurumlar mühüm işlər görür. Həmçinin, bu sahədə qanunvericilik bazası formalaşıb, davamlı olaraq təkmilləşdirilir.

Uşaq hüquqları haqqında”, “Telekommunikasiya haqqında” və “Kütləvi informasiya vasitələri haqqında” Azərbaycan Respublikasının Qanunlarına dəyişiklər edilir. “Uşaqların zərərli informasiyadan qorunması”, “Media haqqında” Qanunları təsdiq edilib, lakin bununla yanaşı, hələ də həllini gözləyən məsələlər var.

Aparılan təhlillər göstərir ki, bu gün bütün əsas sosial institutların fəaliyyətində və cəmiyyətin idarə olunmasında medianın rolunun artması müşahidə olunur, KİV ətraf aləmi qavramağa, həm ictimai, həm də şəxsi həyatda baş verən hadisələrə və onların qiymətləndirilməsinə təsir göstərə bilər, uşaqlar, gənclər, bütövlükdə müxtəlif yaş qrupuna daxil olan insanlar vaxtlarının yarıdan çoxunu mediadan istifadə etməklə keçirirlər”.

Daxili İşlər Nazirliyinin Mətbuat xidmətinin rəisi Elşad Hacıyev mövzu ilə bağlı fikirləri ilə bölüşdükə qey eddib ki, bəzən media orqanları heç bir fakt olmadan yazır ki, orta məktəbdə və ya ali təhsil müəssisəsində narkotik var, ancaq yoxlama nəticəsində heç bir belə hal aşkar edilmir.

“Biri götürüb yazır ki, filan məktəbdə narkotik var, amma ortada bir fakt yoxdur. Yazır ki, orta məktəbdə bu hal var, amma yoxlayırıq, görürük ki, yoxdur. Bunu yazanın məqsədi nədir? Ya kimsə həmin məktəbə direktor gəlmək istəyir, məktəbin ümumi reputasiyasını zədələmək və ya şagird davamiyyətini azaltmaq üçün bunu edir. Biz vətəndaş mövqeyimizi də ortaya qoymalıyıq. Bir məlumat çıxırsa, dərhal nəzarətə götürülür, yoxlanılır”, – deyə o qeyd edib.

O vurğulayıb ki, Daxili İşlər Nazirliyi narkomanlığa qarşı mübarizə ilə bağlı çoxlu sayda tədbirlər həyata keçirir.

“Lakin media bu tədbirləri geniş işıqlandırmır. Media reytinq gətirməyən məlumatları verməkdə maraqlı deyil”, – deyə o əlavə edib.

Qeyd edək ki, Bakıda Medianın İnkişafı Agentliyinin təşkilatçılığı ilə “İctimai proseslər media müstəvisində” mövzusunda Forum keçirilir. Tədbir çərçivəsində “Narkomanlığa qarşı mübarizədə mediadan düzgün istifadə”, “Sosial məsələlərin, həmçinin, məişət zorakılığı və erkən nikah kimi həssas mövzuların mediada düzgün işıqlandırılması”, “Mediada kiberbullinqə qarşı effektiv mübarizə və kiber maarifləndirmə” və “Yaşıl dünya naminə həmrəylik ili”ndə media gündəmi” mövzularında panel sessiyalar təşkil olunacaq.