Azərbaycanın Mərkəzi Bankının fevral ayı üzrə statistik bülleteni dərc edilib.

Bülletenin pul-kredit göstəriciləri ilə bağlı şərhlərinə əsasən bank sektorunda 29 fevral 2024-cü il tarixinə fəaliyyət göstərən 23 bankın filiallarının sayı 475, şöbələrinin sayı 104, ATM-lərin sayı isə 3,064 olub.

Hesabat ayında bank sektorunda çalışanların sayı 1% və ya 245 nəfər artaraq 23,878 nəfər təşkil edib.

Fəaliyyətdə olan bankların cəmi aktivləri 48,735.7 mln. manat, cəmi
öhdəlikləri 42,548.4 mln. manat, balans kapitalı 6,187.3 mln. manat olub.

Fevral ayında bankların kredit portfeli 1.1% və ya 266.7 mln. manat artaraq 23,833 mln. manat olmuşdur. Kredit portfelinin strukturu: ı) biznes kreditləri – 54.8% (13,063.7 mln. manat); ıı) istehlak kreditləri – 29.7% (7,077.3 mln. manat) və ııı) ipoteka kreditləri – 15.5% (3,692 mln. manat). Ay ərzində biznes, istehlak və ipoteka kreditləri müvafiq olaraq 150.8 mln. manat (+1.2%), 69.3 mln. manat (+1%) və 46.5 mln. manat (+1.3%) artmışdır.

Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 1.1 faiz bəndi azalaraq 1.9% təşkil edib.

Öhdəliklərin strukturunda depozit portfeli üstünlük təşkil edir – cəmi öhdəliklərin 82.2%-i və ya 34,959.3 mln. manat. Depozit portfelinin 62.8%-i (21,955.7 mln. manat) hüquqi şəxslərin, 37.2%-i (13,003.6 mln. manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.

2024-cü ilin fevral ayında fiziki şəxslərin əmanətləri 1.3% və ya 172.4 mln manat artaraq 13,003.6 mln. manat təşkil etmişdir. Fiziki şəxslərin əmanət portfelinin 55.2%-i (7,174.2 mln. manat) müddətli əmanətlərdən ibarətdir. Hüquqi şəxslərin tələbli depozitləri 17,037.3 mln. manat olmaqla, hüquqi şəxslərin cəmi depozit portfelinin 77.6%-ni təşkil edib.

Fiziki şəxslərin əmanətlərinin dollarlaşması fevral ayında əvvəlki ilin
müvafiq dövrünə nəzərən isə 3.3 faiz bəndi azalaraq 35.3% təşkil edib.

2024-cü ilin yanvar – fevral aylarında banklar 209.8 mln. manat xalis
mənfəət, 298.3 mln. manat məbləğində əməliyyat mənfəəti əldə ediblər. Cari ilin 2 ayında banklar tərəfindən ümumilikdə 48.1 mln. manat məbləğində mənfəət vergisi ödənilib.

Monetar sektor

Cari ilin fevral ayında manatla geniş mənada pul kütləsi (M2) ötən ilin
müvafiq dövrünə nəzərən 18.1% artaraq 34,264 mln. manat təşkil edib.

Bank sektorunun xarici öhdəlikləri ilin əvvəlinə nəzərən 477.6 mln. manat azalaraq 2,120.5 mln. manat təşkil etmişdir. Xarici öhdəliklərdəki qeyd olunan dəyişiklik əsasən qeyri-rezident hüquqi şəxslərin cari hesablarının həcmindəki azalma ilə əlaqədardır.

Ödənişlər sektoru

Banklar və “Azərpoçt” MMC sistemləri üzrə fevral ayının sonunda
dövriyyədə olan ödəniş kartlarının sayı ötən aya nəzərən 102 min ədəd artaraq 17 milyon 343 min ədəd təşkil etmişdir. Keçən ilin müvafiq dövrü ilə müqayisədə bu göstərici 23.7% artıb. Ödəniş kartlarında artım debet kartları üzrə 24.3%, kredit kartları üzrə 20.2% təşkil edib. Ötən ilin müvafiq dövrünə nəzərən əməkhaqqı kartlarının sayı 150 min, kredit kartları 381 min, digər kartlar isə 2.9 mln. ədəd artıb. Ödəniş kartlarının artması nağdsız ödənişlərin həcminə müsbət təsir göstərib. Belə ki, ay ərzində ölkədaxili nağdsız əməliyyatların həcmi keçən ilin müvafiq dövrü ilə müqayisədə 1.9 dəfə artıb. 2024-ci ilin fevral ayı ərzində kartlar vasitəsilə həyata keçirilən ölkədaxili nağdsız ödənişlərin
həcmi 5,468 mln. manat təşkil edib.

Həyata keçirilən nağdsız ödənişlərin 4,562 mln. manatı elektron ticarətin payına düşür. Qalan məbləğin 897 mln. manatı POS-terminallar, 8.5 mln. manatı isə özünə xidmət terminalları vasitəsilə
gerçəkləşdirilib. İlin əvvəlindən ödəniş kartları ilə nağdsız ölkədaxili
əməliyyatların həcmi ölkədaxili kart əməliyyatlarının 61.8%-ni təşkil edib.

Banklar və “Azərpoçt” MMC-nin ödəniş xidməti şəbəkələri üzrə dinamik
artım müşahidə olunur. Belə ki, keçən ilin fevral ayının sonu ilə müqayisədə bankomatların sayı 2%, POS-terminalların sayı 14.4% artıb.