Əhali tərəfindən dərman vasitələrini qeydiyyatı ilə bağlı ciddi narazılıqlar aradan qaldırılır.

Trend xəbər verir ki, bunu Milli Məclisin Səhiyyə komitəsinin iclasında “Dərman vasitələri haqqında” qanuna dəyişkiliyin müzakirəsi zamanı komitə sədri Əhliman Əmiraslanov bildirib.

O qeyd edib ki, dərman qeydiyyatı üçün çoxlu sayda sənədlər istənilirdi.

“İndi qəbul edəcəyimiz qanun layihəsi bunu nizama salacaq. Dövriyyədə olan dərman vasitələrinin keyfiyyəti ilə bağlı da ciddi narazlıqlar var idi. Belə ki, artıq istehsal olunan dərmanların keyfiyyətinə ciddi nəzarət var.

Keyfiyyətsiz və vaxtı keçmiş dərmanların apteklərdə satılmasının qarşısı alınacaq. Bundan başqa, dərman vasitələrinin qiymətlərinin optimallaşdırılması istiqamətində də işlər aparılır”, – deyə komitə sədri qeyd edib.

Komitə sədri dərmanların qiymətləri ilə bağlı iradlar bəhs edərək bildirib ki, bu gün dərmanların qiymətinin optimallaşdırılması istiqamətində işlər aparılır.

“Elektron resept və təqib sistemi kömək edəcək ki, artıq vətəndaşlar dərmanların qiymətləri barədə rahat məlumat əldə edə bilsinlər.

Ölkəmizdə dərman istehsalı müəssisələrinin fəaliyyətə başlaması rəqabət mühiti yaradacaq və bu da qiymətlərə öz müsbət təsirini göstərəcək”, – deyə o əlavə edib.

Belə ki, yaxın vaxtlarda Azərbaycanda bir neçə dərman müəssisəsinin istifadəyə verilməsi gözlənilir.

“Dərman vasitələri haqqında” Qanuna edilən dəyişikliklər dərman istehsalı sənayesinin inkişafına təkan verdi və artıq bir neçə dərman istehsalı müəssisəsi istifadəyə verilib.

“Bundan sonra da belə müəssisələrin istifadəyə verilməsi gözlənilir. Dərman istehsalı müəssisələrinin yaradılmasında təkcə azərbaycanlı sahibkarlar deyil, eyni zamanda dünyada tanınmış şirkətlər də cəlb olunur.

Belə müəssisələrin istifadəyə verilməsi keyfiyyətli dərman istehsalına, xaricdən ölkəyə gətirilən dərmanların sayının azalmasına imkan verəcək, eyni zamanda dərmanların qiymətinin aşağı düşməsinə şərait yaradacaq”, – deyə komitə sədri əlavə edib.