Milli Məclisdə Bakı-Sumqayıt yolunda müşahidə olunan tıxac probleminin həlli yolları təklif olunub.

Bakı-Sumqayıt arasında metro stansiyasının tikilməsi təklif edilib.

Yerli mətbuatın məlumatlarına əsasən, deputat Fəzail Ağamalı Milli Məclisdə keçirilən “Nəqliyyatın idarə edilməsində yeniliklər və çağırışlar” mövzusunda dinləmədə deyib ki, Bakı-Sumqayıt arasında metrostansiyasının tikilməsi məqsədəuyğundur.

“Bundan əlavə, Lökbatana metro stansiyasının çəkilməsi də faydalı olardı”, – deyə F.Ağamalı bildirib.

Deputat bildirib ki, Sədərək bazarı yolu ən çox tıxac müşahidə olan istiqamətdir.

“Ona görə də Lökbatan istiqamətinədə metro tikilməlidir. Ümumiyyətlə Bakıda sıxlıq çox olan ərazilərə metrostansiyası salınsa, yaxşı olar”, – deyə o, əlavə edib.

Deputatın sözlərinə əsasən, Bakı-Sumqayıt yolu 6 zolaqlı olsa da, paytaxta yaxınlaşdıqca ikizolaqlı olur ki, bu da tıxaclara səbəb olur.

Milli Məclisin deputatı problemlərin həllini yolun daha da genişləndirilməsində görür.

“Bu gün səhər saat 8-də Novxanıdan çıxıb, saat 9:55-də Milli Məclisə çatdım. Bu hər gün olur. Bu problemi həll etmək üçün Yaponiyadakı kimi 2-3 mərtəbəli yollar çəkmək olar”.

Millət vəkili parkinq probleminidə yol infrastrukturunun qurulmasıda buraxılan səhvlərlə əlaqələndirib.

“Şəhərdə sıxlığı aradan qaldırmaq üçün şəxsi avtomobillərin avtovağzala və ya metroyadək getməsi, sonra isə insanların ictimai nəqliyyatdan istifadə etməsi daha uyğundur. Bu təcrübə artıq bir dəfə tətbiq olunub”, – Fəzail Ağamalı bildirib.