İctimai nəqliyyatda sürücü çatışmazlığı var.

Trend-in məlumatına görə, Yerüstü Nəqliyyat Agentliyi İdarə Heyətinin sədri Anar Rzayev Milli Məclisdə keçirilən “Nəqliyyatın idarə edilməsində yeniliklər və çağırışlar” mövzusunda dinləmədə deyib ki, Bakıda fəaliyyət göstərən taksi avtomobillərinin 60 faizinin “yaşı” 15 ildən artıqdır.

O qeyd edib ki, Bakıda taksilərin sayı digər ölkələrdə olan saydan 4 dəfə çoxdur.

“Taksilər gün ərzində 24-25 gediş edir. Bir taksi şəxsi avtomobillə müqayisədə 8-9 dəfə çox gediş edir. 14 mindən çox taksi sürücüsü AYNA-nın təlimlərinə cəlb edilib. Bu proses davam edəcək”, – deyə o, əlavə edib.

İctimai dinləmədə iştirak edən rəqəmsal inkişaf və nəqliyyat nazirinin müavini Rəhman Hümmətov deyib ki, ötən yaydan bugünədək cüzi dəyişikliklər nəticəsində taksilərin sayı 67 mindən 60 minə qədər azalıb.

“Bakının ehtiyac olan taksi sayı 20 min civarında dəyişir. Bu eyni anda 40 minə qədər insanın işsiz qalması demək deyil. Bizim ictimai nəqliyyatda sürücü çatışmazlığımız var”, – deyə nazir müavini bildirib.

O qeyd edib ki, qayda pozuntuları, dayanma-durma ilə bağlı cəzaların sərtləşdirilməsi nəzərdə tutulur.

Öz növbəsində Anar Rzayev onuda qeyd edib ki, Bakıda kifayət qədər avtoparklar olsa da, onlar arasında əlaqələndirmə işi qənaətbəxş qurulmayıb, əlaqələrin tənzimlənməsi üçün yeni sistem tətbiq ediləcək.

A.Rzayev əlavə edib ki, 14 mindən çox taksi sürücüsü AYNA-nın təlimlərinə cəlb edilib və bu proses davam edəcək.

Qeyd edək ki, avtomobil nəqliyyatı ilə fevral ayında 127,5 milyon sərnişin daşınıb və əvvəlki ilin yanvar ayı ilə müqayisədə 5,9 faiz artım qeydə alınıb. Sərnişinlərin 95,4 faizi avtobus, 4,6 faizi isə minik taksilərinin xidmətlərindən istifadə etmişdir. Sərnişin dövriyyəsi isə 6,9 faiz artıb.