Bakıda xəttə olan avtobusların sayı cədvəldə olan avtobusların sayından xeyli aşağıdır. 2200 avtobus əvəzinə 1700 avtobus xəttə çıxırdı.

Trend-in verdiyi məlumata əsasən, Yerüstü Nəqliyyat Agentliyi İdarə Heyətinin sədri Anar Rzayev Milli Məclisdə keçirilən “Nəqliyyatın idarə edilməsində yeniliklər və çağırışlar” mövzusunda dinləmədə deyib ki, daşıyıcılarla aparılan iş nəticəsində avtobusların sayı artırılıb.

“Hazırda xəttə olan avtobusların sayı 2000-dən azdır. Avtobusların sayı 2500-ə çatdırılmalıdır ki, pik saatlarda tələbatı ödəsin”, – deyə o əlavə edilib.

İctimai dinləmədə iştirak edən rəqəmsal inkişaf və nəqliyyat nazirinin müavini Rəhman Hümmətov qeyd edib ki, bu gün ictimai nəqliyyatda mövcud olan avtobusların yarısı tələblərə cavab vermir, köhnədir.

Bu il ölkəyə 100 elektrikli avtobus gətiriləcəyini deyən nazir müavini bildirib ki, növbəti illərdən bu sayın artması proqnozlaşdırılır.

“Bu gün bizə ictimai nəqliyyatda 2500 avtobus lazımdır. Bunu özəl sektorun öhdəsinə qoyduq, amma görürük ki, öhdəsindən gələ bilmir. Tariflərin o həddə qədər artırılmasına biz də qarşıyıq. Dünya ölkələrində ictimai nəqliyyatın təminatına dövlət dəstəyi var. Azərbaycanda bu təcrübəni tətbiq edəcək”, – deyə dövlət rəsmisi əlavə edib.