Azərbaycandan Həcc ziyarəti üçün sənəd qəbuluna başlanılıb.

Qafqaz Müsəlmanları İdarəsinin yaydığı məlumata əsasən, sənədlərin qəbulu bu gündən etibarən iş günləri ərzində saat 10:00-dan 16:00-a kimi Qafqaz Müsəlmanları İdarəsinin Bakı şəhəri, Mirzə Fətəli küçəsi 7 ünvanında yerləşən inzibati binasında aparılacaq.

Ziyarət üçün tələb olunan sənədlər ümumvətəndaş pasportu; şəxsiyyət vəsiqəsinin surəti; 3.5 × 4.5 sm ölçüdə 2 ədəd ağ fonda çəkilmiş rəngli fotoşəkil (qadınlar tünd hicabda) və sağlamlıq haqqında arayışdır.

Bir nəfər üçün ziyarət paketinin qiyməti 5850 ABŞ dolları, yəni 9945 manat təşkil edir. Ziyarət vahid formada təşkil olunacaq və hava nəqliyyatı ilə həyata keçiriləcək.

Qeyd edək ki, ötən illə müqayisədə bu il həcc ziyarəti paketinin qiyməti (5 750 ABŞ dolları) 100 dollar (170 manat) artıb.