Cari il üçün əmək pensiyalarının indeksləşdirilmə əmsalı olaraq 10,8 faiz proqnoz gözlənilir.

Dövlət Sosial Müdafiə Fondunun (DSMF) sədri Himalay Məmişov bu gün keçirilən mətbuat konfransı zamanı çıxışında bu məlumatı səslənddirib.

“Yəqin ki, fevral ayının əvvəlində bu indeksləşdirmə həyata keçiriləcək. Fevral ayında həm yanvar, həm də fevral ayının indeksləşmə xərci vətəndaşı pensiyasına əlavə edilərək ödənilənəcək”, – o qeyd edib.

Pensiya təminatı sahəsində görüləcək tədbirlər haqda bəhs edərək qurumun rəhbəri bildirib ki, özəl pensiya fondu ilə bağlı normativ sənədlər hazırlanıb.

O qeyd edib ki, bir ay ərzində layihələr aidiyyəti qurumlara göndəriləcək.

Bir müddət öncə H.Məmişov bildirib ki, özəl pensiya fonduna investisiyalar uzunmüddətli hesab olunur.

“Fondun yaradılması istiqamətində hazırlanan qanunvericilik aktlarının təkmilləşdirilməsi istiqamətində və aidiyyəti qurumlarla razılaşdırma prosesini aparırıq. Bu prosesin yekununda müvafiq layihələr Milli Məclisə təqdim olunacaq”, – deyə o əlavə edib.

DSMF rəsmisi pensiya yaşına çatmadan pensiya kapitalından istifadə məsələsinəddə aydınlıq gətirib.

“Bu metodologiya özəl pensiya fonduna xas olan cəhətdir. Özəl pensiya fondu ilə bağlı da normativ sənədlər hazırlanıb.Pensiya təyin olunmadan vəfat edən şəxsin isə pensiya kapitalı vəfat edən şəxsin ailə üzvlərinin maddi təminatının yaxşılaşdırılması istiqamətində istifadə olunur”,- deyə o bildirib.

H.Məmişov tədbir zamanı 2023-cü ildə Birinci Qarabağ müharibəsində yaralanan (91-97-ci illər üzrə) 495 nəfərə birdəfəlik ödəmə təyin edildiyini qeyd edib.

O deyib ki, bu zamana qədər isə 91-97-ci illər üzrə 17367 nəfərə birdəfəlik ödəmə təyin olunub.

Qeyd edək ki, Nazirlər Kabinetinin yeni təsdiq etdiyi Qaydaya uyğun olaraq, Əmək və Əhalinin Sosial Müdafiəsi Nazirliyi tərəfindən Birinci Qarabağ müharibəsi əlillərinə birdəfəlik ödəmələrin verilməsinə başlanılıb. Proqram “Hərbi qulluqçuların dövlət icbari şəxsi sığortası haqqında” Qanunun qüvvəyə mindiyi 1997-ci il avqustun 2-dək hərbi xidmətdə olarkən aldığı xəsarət nəticəsində əlilliyi müəyyən edilmiş hərbi qulluqçuları və daxili işlər orqanları əməkdaşlarını, onlardan vəfat edənlərin vərəsələrini əhatə edir.

Birdəfəlik ödəmənin məbləği I dərəcə əlilliyə görə – 8 800 manat, II dərəcə əlilliyə görə – 6 600 manat, III dərəcə əlilliyə görə – 4 400 manat təşkil edir.

Qurumun sədri lokal antiterror tədbirlərində şəhid olanların ailə üzvlərinə təqaüd ödənişlərinin davam etdirildiyini bildirib.

“Bəzi hallarda ödnişlər üçün sənədlər fondun əməkdaşları tərəfindən toplanır. Ödənişlər proaktiv qaydada təyin olunur. Bu əməliyyatlarda iştirak edənlərə ödənişlərin verilməsi onların məlumatları zəfər altsisteminə salındıqca həyata keçirilir. Bu prosesdə hər hansı ləngimə ola bilməz”, – o qeyd edib.

Xatırladaq ki, Azərbaycan Ordusunun Qarabağda başlatdığı lokal xarakterli antiterror tədbirləri separatçıların təslim olması ilə nəticələnib. Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq, tam atəşkəs haqqında razılaşma əldə olunub və 2023-cü il sentyabrın 20-də saat 13:00-da lokal xarakterli antiterror tədbirləri dayandırılıb.