Azərbaycanın əməkdar artisti Aygün Hümmətova (Bəylər) vəfat etdi.

6 yanvar 2024-cü ildə ölümü ilə bağlı xəbərlər yayılsa da, Mədəniyyət Nazirliyi bu xəbərləri təkzib edib.

Vəziyyətinin ağır olduğu, saat 22:50-də Ankara-Bakı reysi ilə Azərbaycana gətiriləcəyi açıqlanıb.

Bir neçə saat sonra Mədəniyyət Nazirliyi Aygün Bəylərin Ankara şəhərində vəfat etdiyini təsdiqləyib. Faktı Aygün Bəylərin prodüseri də qəbul edib. Hazırda müğənninin nəşinin Bakıya gətirildiyi bildirilir.

Aygün Hümmətova (Bəylər) 22 avqust 1975-ci ildə Bakıda anadan olub. İlkin musiqi təhsilini Səttar Bəhlulzadə adına mədəniyyət sarayının musiqi məktəbində nağara sinfi üzrə alıb.

1988 ildə yaradılan Azərbaycan Dövlət Uşaq Filarmoniyası elə həmin ildə istedadlı uşaqların müsabiqə yolu ilə fiarmoniyaya qəbulunu keçirib və 13 yaşlı Aygün filarmoniyaya qəbul edilib. Peşəkar səhnəyə ilk gəlişi də elə bu dövrə təsadüf edir.

1995-ci ildə Şövkət Ələkbərova adına ilk peşəkar musiqi kollektivini yaradaraq geniş konsert fəaliyyətinə başlayır – televiziya, radio, böyük dövlət təbirləri və eləcə də, artıq ardıcıl şəkildə xaricdə Azərbaycan musiqi sənətini təmsil edir.

Aygün Hümmətova 1998-ci ildə Azərbaycan Dövlət Konservatoriyasının xanəndəlik fakültəsinə daxil olub və bununla onun sənət taleyində yeni səhifə açılıb.

2002-ci ildə Azərbaycan Respublikasının Prezidenti Heydər Əliyevin imzası ilə Azərbaycan Respublikasının əməkdar artisti fəxri adına layiq görülüb.

Bu dövrdən başlayaraq, 2005–2010 illər arası Aygün Hümmətova Fransa, İspaniya, Mərakeş, ABŞ, İngiltərə, Rusiya, Türkiyə, Yunanıstan, Hollandiya, Almaniya, Cənubi Koreya, İsveç, Danimarka və s. ölkələrdə keçirilən musiqi festivallarının daimi iştirakçısı kimi solo konsertlərlə çıxışlar edib.

Aygün Hümmətovanın “Humayun” muğamının üzərində simfonik – muğam yazmaq istəyi nəticəsində 2012 ildə Aygün Azərbaycan Dövlət Musiqi Akademiyasının yeni açılan simfonik dirijorluq və bəstəkarlıq fakültəsinə daxil olub.

Xanəndəliklə yanaşı Aygün Hümmətova 2013 ildən etibarən ATV telekanalında ” Yenə o bağ olaydı” adlı müəllif proqramıyla efirə çıxıb.

O, eyni zamanda özünü kinoda da sınayıb və Qış nağılı (2002), Qış Nağılı (2003), Bakı bağları. Buzovna (2007) filmlərinin çəkilişlərində iştirak edib.