Yeni il yaxınlaşır… Azərbaycanda Yeni il ikiqat sevinclə qeyd edilir, çünki eyni tarixdə Dünya azərbaycanlılarının həmrəylik günü qeyd edilir. Sizi bilmirəm, amma mən Yeni il bayramını çox sevirəm, daxilimdəki uşaq hələ də bu bayramın ertəsi günü hansısa bir sehrin baş verəcəyinə və yeni bir dovrün başlanacağına ümid ilə yaşayır.

Bu baş vermədiyi halda isə mümkün qədər bayram günlərini əyləncəli və müsbət enerji ilə dolu keçirməyə çalışıram, necədə olsa yeni təqvim ili başlayır. Deyilənə görə yeni ilin ilk 12 gününü necə keçirsəniz ilinizde elə keçəcək.

Nəisə, xurafatı kənara qoyaq, sualımıza qayıdaq.

Yeni il menyusu bizim evdə ildən ilə dəyişsədə daimi olan yeməklərimiz var, hansı ki, ailə üzvlərim tərəfindən sevilib və gözlənilir.

Bu yeməklər arasında soyuq qəlyanaylılardan ananas salatı əsas yer tutur. Özünəməxsus dadı ilə seçilən salatdır. Onun bir tarixçəsi var.

Biz, jurnalistlər, tez-tez müxtəlif tədbirlərdə iştirak edirik. Beş ulduzlu oteldə keçirilən tədbirlərdən birində nahar zamanı ilk dəfə ananas salatının dadına baxdıqdan sonra, onun tərkibinə nəzər saldım və mütləq ailəm üçün hazırlayacağımı düşündüm.

Axtarış sistemində uzun axtarışlardan sonra reseptini tapdım və hazırladım, lakin təəssüf ki, gözlədiyim kimi alınmadı.

Bir müddət sonra, yeni il ərəfəsində, şirkətimizdə birgə çalışdığım qızlardan birinin nə vaxtsa həmin oteldə işlədiyini təsadüfən öyrəndim və salatın sirrini soruşdum. Beləliklə, ananas salatı həmin ildən bizim Yeni il menyumuzun daimi hissəsinə çevrildi.

İsti yeməklərdən isə Yeni il süfrəmizdə daimi olan toyuq ləvəngisi və plovun müxtəlif növləridən biridir. Qarşıdan gələn ilin Çin təqviminə əsasən nə ili olduğundan asılı olaraq menyuma hər il yeni bir yemək əlavə edirəm, bu salat, isti xörək və ya desert ola bilər.

Lakin onuda deyim ki, bayram süfrəsində olan yeməklər qədər vacib olan masanın ətrafında toplanan insanlar və ümumi bayram əhval-ruhiyyəsidir.

Hər birimizə Yeni ili yüksək əhval-ruhiyyə ilə, ürəyimizcə olan insanlarla və yeməklərlə süfrə arxasında toplaşmağı, bayram səhəri 2023-cü ilin uğursuzluqlarını, kədərini və dəhsətlərini geridə qoyub həyata sülh və əminamanlıq şəraitində yeni səhifədən davam etməyi arzu edirəm.